Kolki hrošaj ułady traciać na mihrantaŭ i kolki na biełarusaŭ. Ličby ŭražvajuć
Alaksandr Łukašenka acaniŭ vydatki Biełarusi na dapamohu mihrantam na miažy ŭ 25 młn dołaraŭ. Pahladzieli, ci moža biełarus za MKADam, šarahovy padatkapłatnik, paradavacca za mihrantaŭ, ci značnyja heta hrošy dla biudžetaŭ biełaruskich rajcentraŭ.
Alaksandr Łukašenka 30 listapada acaniŭ vydatki Biełarusi na dapamohu mihrantam u 25 młn dołaraŭ. Tydzień tamu, pa jaho słovach, vydatki składali $12,6 młn. Padrabiaznyja ličby vydatkaŭ na mihrantaŭ nieviadomyja.
«Heta značyć, uvieś dahlad, karmleńnie, abahravańnie, lačeńnie…» — udakładniŭ u intervju Dźmitryj Kisialoŭ.
«Absalutna», — paćvierdziŭ Łukašenka. Pry hetym udakładniŭ, što avijarejsy ź mihrantami ŭ Irak byli za košt irakskaha boku.
Žurnalisty najbujniejšaha biełaruskaha partała, pryznanaha ŭładami ekstremisckim, patelefanavali na pramuju liniju Hrodzienskaha abłvykankama (łahier raźmieščany na terytoryi Hrodzienskaj vobłaści) i spytali padrabiaznaści, na što pajšli hrošy (tady było viadoma tolki pra 12,6 miljona dołaraŭ).
U Hrodzienskim abłvykankamie nie stali abviarhać hetyja ličby i rastłumačyli, što ŭtrymańnie mihrantaŭ patrabuje niemałych srodkaŭ, i «kožny dzień hetaja suma raście».
Pavodle abłvykankama, hrošy, naprykład, iduć na apłatu pasłuh ŽKH, uborku centra, pradukty, mieddapamohu. Pralnych mašyn u łahiery niama, adpaviedna, siudy nieabchodna ŭklučyć pasłuhi pralni. Akramia taho, jašče i pracu miedykaŭ, pamiežnikaŭ, mytnikaŭ i inšych admysłoŭcaŭ.
— Tam nichto sam nie hatuje, usio heta robiać kuchary, — udakładnili ŭ abłvykankamie, što ŭ vydatki varta ŭklučyć i pracu kucharaŭ.
Dakładna nie viadoma, kolki ŭ łahiery znachodzicca mihrantaŭ. Pa roznych acenkach, 2‒3,5 tysiačy čałaviek. 1876 čałaviek vyvieźli piaćciu evakuacyjnymi rejsami. Ale kolki zastałosia ŭ Bruzhach — adkazu niama.
Łahier źjaviŭsia na miažy 8 listapada. 23 dni, mienš čym miesiac mihranckaha łahiera Łukašenka acaniŭ u 25 młn dołaraŭ.
Pa siońniašnim kursie heta 63,7 młn rubloŭ. Heta vydatki, dapuścim, na 3,5 tysiačy mihrantaŭ.
Što aznačajuć hetyja ličby dla biełarusaŭ?
Zirniem u miascovyja biudžety. Słavutaja Ščučynščyna znachodzicca zusim pobač ź mihranckim łahieram ‒ usiaho ŭ 80 km ad Bruzhoŭ. I heta jak raz Hrodzienskaja vobłaść, dzie i znachodzicca mihrancki łahier.
U Ščučynskim rajonie na pačatak 2021 hoda žyŭ 34 691 čałaviek — u 10 razoŭ bolš, čym u mihranckim łahiery.
Pahladzim rajonny biudžet na 2021 hod. My bačym tam amal znajomuju ličbu.
Raschody biudžetu Ščučynskaha rajona z nasielnictvam u 35 tysiač čałaviek na 12 miesiacaŭ 2021 hoda składajuć 65 młn rubloŭ.
Na miesiac mihranckaha łahiera biełaruskija ŭłady vydatkavali ŭ pieraliku amal 64 młn rubloŭ, i «kožny dzień hetaja suma raście».
Raschody biudžetu Ščučynskaha rajona ‒ heta nie tolki «dahlad, karmleńnie, abahravańnie, lačeńnie…», ale i adukacyja, kultura, ŚMI, fizkultura, sport, ŽKH, sielskaja haspadarka, transpart, achova pryrody, tyja ž achova zdaroŭja i sacyjalnaja palityka, z zarobkami biudžetnikam, i navat jašče niejkija «inšyja raschody».
Na ŭvieś rajon u 35 tysiač čałaviek na hod u miascovym biudžecie stolki ž hrošaj, kolki ŭłady vydatkoŭvajuć na miesiac žyćcia mihrantaŭ, jakich u dziesiać razoŭ mienš, čym žycharoŭ Ščučynskaha rajona.
Možna pahladzieć i na inšyja rajony, naprykład, na Słonimski. Miesiačny biudžet łahiera ŭ Bruzhach słanimčanie «prajeli» za 6 miesiacaŭ: vydatki miascovaha kansalidavanaha biudžetu skłali 59 młn rubloŭ. Heta navat trochi mienš za 64 młn. U rajonie na pačatak hoda było 62 962 čałaviek ‒ prykładna ŭ 20 razoŭ bolš, čym mihrantaŭ.
Śvisłacki rajon. Taksama Hrodzienskaja vobłaść. Tut na pačatak hoda pražyvali 14242 žychary. U čatyry razy bolš, čym u mihranckim łahiery.
Na 12 miesiacaŭ usich vydatkaŭ miascovaha kansalidavanaha biudžetu tut zapłanavana 37 młn rubloŭ. Amal udvaja mienš, čym na miesiac žyćcia mihranckaha łahiera.
Jak bačym, biełarusy mohuć paradavacca za mihrantaŭ. Bo, kaniečnie, «my słavianie, u nas duša takaja ŭ ludziej». Tolki ŭzrovień žyćcia, atrymoŭvajecca, nižejšy, čym u mihranckim łahiery.
Niamiecki Čyrvony Kryž vydzielić mihrantam na miažy 143 tysiačy jeŭra. Na kožnaha ‒ prykładna jak piensija biełarusa. Ale heta nie ŭsio
«Mianie zabrali z pracy». Za kamientary pra mihrantaŭ zatrymlivajuć biełarusaŭ i prymušajuć vybačacca na videa
