Hałoŭny mytnik Biełarusi raskryŭ schiemy, jak abychodzić sankcyi. Paśla jaho adcenzuravali
Staršynia Dziaržaŭnaha mytnaha kamiteta Biełarusi Uładzimir Arłoŭski 10 krasavika vystupiŭ u Saviecie Respubliki. Tam jon pradstaŭlaŭ zakonaprajekt, jaki dazvolić lehalna realizoŭvać u krainie sankcyjnyja tavary, dakumientalna aformlenyja jak tranzitnyja. Ale, jak vyhladaje, nahavaryŭ i lišniaha, zaŭvažyŭ «Biełsat».
Uładzimir Arłoŭski. Fota: belta.by
U svaim vystupie čynoŭnik raskryŭ schiemy, što buduć vykarystoŭvacca dla abychodu sankcyjaŭ. Jahonyja słovy spačatku byli apublikavanyja na sajcie BiełTA, ale paśla ich vydalili. Tym nie mienš, adcenzuravanyja cytaty zachavalisia na sajcie rasijskaha TASS.
«Va ŭmovach ustanoŭlenaha niedružalubnymi krainami technałahičnaha embarha dla vyrašeńnia pytańniaŭ pastaŭki ŭ krainu sankcyjnaha abstalavańnia, syraviny i kamplektujučych zakonaprajekt stvaraje ŭmovy dla mahčymaści realizacyi sa składoŭ časovaha zachoŭvańnia biełaruskim pradpryjemstvam tavaraŭ, jakija ekspartujucca ź Jeŭrasajuza ŭ adras trecich krain tranzitam praź Biełaruś. Naprykład, abstalavańnie dakumientalna afarmlajecca tranzitam ź Jeŭropy ŭ Aziju i na terytoryi Biełarusi realizujecca biełaruskamu pradpryjemstvu. Dziejnym zakanadaŭstvam taki prodaž nie praduhledžany», — skazaŭ staršynia Mytnaha kamiteta.
Uładzimir Arłoŭski adznačyŭ, što časta dla abychodu sankcyj abstalavańnie ŭvoziać u krainu pa častkach, z vykarystańniem šmatstupiennych łahistyčnych łancužkoŭ.
«Dla taho, kab ich mytnaja ačystka adbyvałasia pavodle mienšych mytnych stavak, jak heta ŭstanoŭlena dla technałahičnych linij i inšaha kamplektnaha abstalavańnia, z 30 kalandarnych da 15 pracoŭnych dzion skaročany termin pryniaćcia mytnym orhanam rašeńniaŭ pa kłasifikacyi tavaraŭ u razabranym vyhladzie. Adznaču, što, naprykład, u Rasijskaj Fiederacyi taki termin składaje 90 dzion, my prapanujem 15 dzion», — skazaŭ jon.
Taksama dla spraščeńnia ŭvozu sankcyjnych tavaraŭ praduhledžanaje pryniaćcie mytniaj papiarednich rašeńniaŭ adnosna mytnaha koštu tavaraŭ da ich uvozu. Heta dazvolić imparcioram pry adsutnaści niepasrednych stasunkaŭ z pradaŭcami zahadzia płanavać svaje vydatki na mytnyja płaciažy. Taksama praduhledžvajecca mahčymaść adterminoŭki abo rasterminoŭki vypłaty vyvaznych mytaŭ.
Akramia taho, dla źnižeńnia administracyjnaj nahruzki płanujecca skasavać patrabavańnie atrymlivać dazvoł mytni na markiroŭku zamiežnych tavaraŭ, što dapamoža chutčej uklučać tavary ŭ abarot unutry krainy, a taksama naraścić abjomy pasłuh pa markiroŭcy tavaraŭ, jakija iduć u adras imparcioraŭ krain JEAES. Skaračajecca pieralik dakumientaŭ, jakija padajucca ŭ mytniu pry ažyćciaŭleńni administracyjnych pracedur, a šerah papiarovych dakumientaŭ zamianiajecca elektronnymi.
Čytajcie taksama:
U Bresckaj vobłaści źniali zabaronu na vyvaz tavaraŭ u Polšču
pa sutnaści łukašenkaŭski mytnik Arłoŭski zaklikaje da pramoha parušeńnia Kanviencyi AAN ab damovie mižnarodnaj darožnaj pieravozki hruzaŭ ad 1956. Bo p.1 art.12 Kanviencyi daje prava źmianić hruzaatrymalnika vyklučna hruzaadpraŭniku. Źmianiać hruzaatrymalnika biez zhody hruzaadpraŭnika - heta ŭciahvańnie ŭ machlarstva hruzapieravozčykaŭ i uładalnikaŭ mytnych składoŭ. Kali ž heta pačnuć masava rabić hruzaapdpraŭniki - jany naŭprost parušać sankcyjny režym JEZ, ab kryminalizacyi čaho ŭ JEZ pytańnie ŭžo ŭźniataje. Skončycca heta tym, što JEZ albo ŭviadzie składanuju praceduru kantrola za dastaŭkaj da krainy pryznačeńnia tavaraŭ, albo prosta zabaranić tranzit praz "Sojuznoje h...".