— … Tolki vy, darahi tavaryš z Paryžu, pluńcie na ŭsio heta.
— Jak plunuć?!
— Ślinaj, - adkazaŭ Astap, — jak plavali da epochi histaryčnaha materyjalizmu. Ničoha nia vyjdzie.
(I.Ilf, Ja.Piatroŭ, "Dvanaccać kresłaŭ")
U kuluarach kijeŭskaj sesii PA ABSE, jakaja maje pryniać rezalucyju ŭ pytańni Biełarusi, ščyruje čaćviorka sustaršyniaŭ Palitrady ADS. Narešcie vyrvalisia na mižnarodny absiah, skinuŭšy manapoliju "demakratyčnaha kamandante"! :) Što da samoha prajektu, dyk tam "usio ŭklučana" — ad słova ŭ abaronu treciaha sektaru da zakliku demakratyzavać vybarčaje zakanadaŭstva.
Niedziaržaŭnyja medyi adsočvajuć intryhu. Delehacyja Pałaty prapanoŭvała źniać dakument z abmierkavańnia. Numar nie prajšoŭ. Pad voknami budynka, dzie prachodzić sesija, šumić pikiet u padtrymku rezalucyi. "…U pradstaŭnikoŭ aficyjnaj delehacyi zastajecca tolki adna mahčymaść — cieraz uniasieńnie papravak źmiakčyć dla siabie rezalucyju", — kamentuje z ukrainskaj stalicy Anatol Labiedźka.
Dadamo: u tutejšych uładaŭ zastajecca i inšaja, vyznačalnaja mahčymaść. Naplavać na tuju rezalucyju i raścierci.
U mižnarodnych arhanizacyj niašmat vaharoŭ uździejańnia na Miensk. Ale kali Eŭraźviaz, naprykład, usio ž uščyknuŭ skasavańniem preferencyj, to ŭ arsenale ABSE niama i takich sankcyj. Uvohule heta nadzvyčaj strakataja dy amorfnaja struktura, u miežach jakoj demakratyzatarski impet zachodnich dziaržaŭ tarpedujuć Rasija dy inšyja postsavieckija krainy z aŭtarytarnymi režymami. Voś i ŭ Kijevie za aficyjny Miensk zastupilisia pradstaŭniki Maskvy, Astany, Baku… "Z PA ABSE navat vyklučyć nikoha nia mohuć, — nahadvaje mienski palitolah Andrej Fiodaraŭ. — U statucie arhanizacyi niama, naprykład, takoha paniatku, jak niedemakratyčna abrany parlament".
Tym časam kiraŭnica biełaruskaha CVK Lidzija Jarmošyna ŭ dvuch interviju — učorašnim dla "Vriemieni novostiej" i siońniašnim dla BiełaPAN — faktyčna ŭžo dała adkaz na budučuju rezalucyju PA ABSE.
Ź jejnych vykazvańniaŭ vynikaje nastupnaje:
— naša vybarčaje zakanadaŭstva i tak nia horšaje, a mo' j lepšaje, čym u mnohich krainach Zachadu;
— ABSE sama nia viedaje, čaho choča, dyskusii ź joj biasplonnyja;
— vieści pieramovy pra źmienu praviłaŭ elektaralnaj hulni možna było b chiba z mocnaj apazycyjaj, a nie z takoj, jak u nas.
Apošniaja teza jość klučavoj. Sapraŭdy, ułada ličycca tolki z mocaj. Siońniašniaja tytulnaja apazycyja jaje nie pałochaje (heta fakt, a nia kamień u harod demakratyčnych pravadyroŭ — pijanisty hrajuć, jak umiejuć). Pamiatajecie, u Alaksandra Łukašenki vyrvałasia: strašnaja nie apazycyja, strašny defołt. "Defołt" tut (chaj erudyty nie prydzirajucca!) užyty — mo' praz svajo tajamniča-pahroźlivaje hučańnie — jak zborny vobraz ekanamičnaha abvału. Pakul hetaja łavina nie papaŭzła (a peŭnaja rezerva tryvałaści jościeka), kiroŭnyja viarchi buduć apryjory čchać na ŭsie rezalucyi.
