U Biełarusi zaćvierdžana dziaržaŭnaja prahrama adradžeńnia technałohij i tradycyj vytvorčaści słuckich pajasoŭ i raźvićcia vytvorčaści nacyjanalnaj suvienirnaj pradukcyi «Słuckija pajasy» na 2012–2015 hady.
Heta praduhledžana pastanovaj Savieta ministraŭ № 1069 ad 22 listapada, paviedamiła
pres-słužba ŭrada.
Dziaržprahrama ŭjaŭlaje saboj kompleksnuju sistemu mier pa realizacyi dziaržaŭnaj palityki ŭ śfiery zachavańnia tradycyj i raźvićcia nacyjanalnaha mastactva, narodnych mastackich promysłaŭ (ramiostvaŭ).
Jak adznačyła pres-słužba, «słuckija pajasy majuć vialikaje značeńnie dla abaznačeńnia biełaruskaha dekaratyŭna-prykładnoha mastactva ŭ sučasnaj jeŭrapiejskaj i suśvietnaj kulturnaj prastory. Vykarystańnie patencyjału artefaktu ajčynnaj kultury jak nacyjanalnaha brenda suvienirnaj pradukcyi mastackich promysłaŭ (ramiostvaŭ) moža być efiektyŭnym dla farmiravańnia i ŭmacavańnia pazityŭnaha imidžu krainy».
U dziaržprahramie abaznačany praviadzieńnie daśledavańniaŭ historyi ŭźniknieńnia, mastackich asablivaściaŭ i charaktarystyk, vyjaŭleńnie asnoŭnych typałahičnych varyjantaŭ słuckich pajasoŭ na asnovie miascovaj pradukcyi XVIII-pačatku XIX stahodździaŭ i ich etnasacyjalnych funkcyj;
daśledavańnie charaktaru i
technika-technałahičnych asablivaściaŭ vytvorčaści aŭtentyčnych słuckich pajasoŭ na Słuckaj manufaktury; vyvučeńnie materyjałaŭ, jakija vykarystoŭvalisia ŭ vytvorčaści aŭtentyčnych słuckich pajasoŭ, i raspracoŭka prapanoŭ pa ich zamienie ŭ sučasnych umovach pramysłovaj vytvorčaści «pry zachavańni asnoŭnych
vobrazna-płastyčnych asablivaściaŭ».
Taksama płanujecca praviadzieńnie mižnarodnych i respublikanskich kanfierencyj, sieminaraŭ i majstar-kłasaŭ z udziełam śpiecyjalistaŭ u śfiery tekstylu XVIII–XIX stahodździaŭ i vytvorčaści sučasnaj suvienirnaj pradukcyi; praviadzieńnie respublikanskich vystaŭ sučasnaha narodnaha dekaratyŭna-prykładnoha mastactva i nacyjanalnaj suvienirnaj pradukcyi biełaruskich mastackich promysłaŭ (ramiostvaŭ); stvareńnie muziejaŭ i mastackich halerej tradycyjnaha i sučasnaha narodnaha dekaratyŭna-prykładnaha mastactva i nacyjanalnaj suvienirnaj pradukcyi biełaruskich mastackich promysłaŭ (ramiostvaŭ); stvareńnie sistemy padrychtoŭki śpiecyjalistaŭ u miežach śpiecyjalizacyj «Dyzajn tekstylnych vyrabaŭ», «Mastackaje prajektavańnie tekstylnych pałotnaŭ» i ŭklučeńnie ŭ vučebnyja płany i prahramy dyscyplin pa historyi i technałohii vytvorčaści słuckich pajasoŭ.
«Takaja ŭnikalnaja historyka-kulturnaja źjava, jak słuckija pajasy, sfarmiravałasia ŭ vyniku histaryčnaha, etničnaha, kulturnaha, sasłoŭnaha raźvićcia biełaruskich ziemlaŭ u składzie Vialikaha kniastva Litoŭskaha. Pajasy adroźnivajucca charakternymi vobrazna-płastyčnymi rysami, što dazvalaje havaryć pra hetu źjavu jak pra vyklučny fienomien ajčynnaha dekaratyŭna-prykładnoha mastactva, jaki arhanična ŭpisaŭsia ŭ kulturny kantekst Jeŭropy druhoj pałovy XVIII — pačatku XIX stahodździa», — adznačyli ŭ pres-słužbie.
Dla Biełarusi «słuckija pajasy nie prosta znak, heta sapraŭdny prykład nacyjanalnaha honaru i poŭnaściu sfarmiravany brend. Słuckim pajasam pryśviečanyja mnohija mastackija tvory — vieršy, pieśni, tancy, tvory vyjaŭlenčaha mastactva».
U biełaruskich muziejach zachoŭvajecca tolki 11 cełych pajasoŭ. Technałohii tkactva, jakija vykarystoŭvalisia pry ich vytvorčaści, poŭnaściu zhublenyja.
«Adradžeńnie vytvorčaści słuckich pajasoŭ, vykanańnie ich anałahaŭ, kopij, vykarystańnie mastackich stylizacyj u suvienirnaj pradukcyi ihraje značnuju rolu ŭ sučasnym ekanamičnym i kulturnym žyćci Biełarusi, źjaŭlajecca važnym u pradstaŭnickich metach, muziejnaj i sceničnaj praktycy», — ličać va ŭradzie.
BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH