Brescki handbolny kłub imia Miaškova atrymaŭ dźvie pieramohi ŭ SEHA-lizie

Brescki handbolny kłub (BHK) imia Miaškova paśpiachova adnaviŭ vystupleńnie ŭ SEHA-lizie — turniry, jaki abjadnoŭvaje dziesiać kłubaŭ ź Biełarusi, Charvatyi, Bośnii i Hiercahaviny, Słavakii, Makiedonii. 5 śniežnia ŭ baśnijskim horadzie Lubuški brestaŭčanie atrymali pieramohu nad miascovym kłubam «Iźvidžač» ź likam 31:27.

8 śniežnia ŭžo doma, u Pałacy sportu «Viktoryja», BHK prymaŭ najmacniejšy kłub Słavakii — «Tatran» z Prešava, jaki 10 hadoŭ zapar vyjhraje čempijanat svajoj krainy. Padčas pieršaj sustrečy z BHK, jakaja adbyłasia 29 vieraśnia ŭ Prešavie, «Tatran» pieramoh ź likam 36:40. Adnak u subotu ŭ rodnych ścienach z roźnicaj u piać miačoŭ atrymaŭ pieramohu BHK — 34:29. Samymi vynikovymi byli datčanin Chienryk Knudsan i baśnijski charvat Ivan Karačyč, jakija zakinuli pa piać miačoŭ. BHK budzie mieć pieravahu nad «Tatranam» u vypadku roŭnaści ačkoŭ sa słavackim kłubam.

Paśla hulni hałoŭny trenier brestaŭčan Mihlus Astraŭskas skazaŭ: «Rady pieramozie, ale nie treba zabyvać, što na nastupnym tydni nas čakajuć dźvie važnyja sustrečy z makiedonskim „Mietałurham“ u SEHA-lizie i minskim „Dynama“ ŭ čempijanacie Biełarusi. Hety tydzień prajšoŭ udała, abyšlisia biez traŭm i vykanali zadaču-maksimum, vyjhraŭšy dva važnyja pajadynki».

Z makiedonskim «Mietałurham» BHK zhulaje na damašniaj placoŭcy 12 śniežnia, a 15-ha ŭ Minsku pasprabuje ŭziać revanš za paražeńnie ŭ pieršym kruzie ŭ staličnaha «Dynama». Minčanie paśla vaśmi praviedzienych pajadynkaŭ majuć u aktyvie 15 ačkoŭ i lidzirujuć u čempijanacie krainy. U BHK — 8 ačkoŭ paśla šaści matčaŭ i 3-je miesca ŭ turnirnaj tablicy.

Što da SEHA-lihi, to, niahledziačy na debiut u hetym turniry, brestaŭčanie staviać pierad saboj zadaču trapić u jaho finał, dzie čatyry najlepšyja kamandy razyhrajuć hałoŭny pryz. Kłub z Bresta pakul idzie ŭ turniry piatym.

Tydzień tamu BHK nie ŭdałosia trapić u viasnovy etap Kubka Jeŭrapiejskaj handbolnaj fiederacyi — 1 śniežnia brestaŭčanie dvojčy sastupili niamieckamu «Hiepinhienu».

Hetaje paražeńnie ŭ ambicyjnym bresckim kłubie ŭspryniali vielmi baluča. Hałkipier nacyjanalnaj zbornaj Biełarusi Vital Čarapieńka i vuhłavy Raman Koleśnieŭ byli sasłanyja ŭ druhuju kamandu kłuba, a ź sierbam Filipam Ščepanavičam BHK vyrašyŭ rasstacca. Handbalist źmienić kamandu adrazu paśla Novaha hoda, jak tolki adkryjecca tranśfierny rynak. Na źmienu Ščepanaviču ŭ charvackaha «Nieksie» kupleny 22-hadovy pravy paŭsiaredni Robiert Markacič, jaki ŭžo debiutavaŭ u składzie bresckaha kłuba.

0

0

0

0

0

0

Aleś Laŭčuk, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH