11 lipienia ŭ sudzie Leninskaha rajona Minska pavinien byŭ być vyniesieny prysud K.Łukašovu - bratu hramadskaha dziejača Viačasłava Siŭčyka. Na siońniašnim pasiadžeńni prakuror paprasiŭ adnavić sudovaje śledstva ŭ suviazi ź nieabchodnaściu dopytu jašče adnaho śviedki - načalnika milicyi hramadskaj biaśpieki Centralnaha rajona stalicy Hryba. Nibyta paciarpieły milicyjanier Anatol Suščenia padčas zdareńnia telefanavaŭ svajmu načalniku - Hrybu.
Abarona K.Łukašova była suprać chadajnictva prakurora, tamu što Hryb na momant nibyta ŭčynienaha złačynstva nie mieŭ nijakaha dačynieńnia ni da paciarpiełaha Suščeni, ni da Łukašova i nie źjaŭlaŭsia načalnikam milicyi hramadskaj biaśpieki Centralnaha rajona. K.Łukašoŭ taksama zajaviŭ, što jamu stavicca ŭ vinu najezd na supracoŭnika milicyi, a telefanavańni nie mohuć słužyć śviedčańniem hetaj padziei.
Sud zadavoliŭ chadajnictva dziaržaŭnaha abvinavaŭcy i pastanaviŭ dapytać u jakaści śviedki Hryba.
"Heta zaciahvańnie pracesu. Absalutna zrazumieła, što śviedka z boku prakuratury nie moža pakazać ničoha pa sutnaści spravy. Tym nie mienš sud vynies rašeńnie zadavolić chadajnictva prakurora", - zaznačyŭ V.Siŭčyk.
Niahledziačy na chadajnictva prakurora, Hryb na praces nie źjaviŭsia. U suviazi z hetym sudździa Taćciana Žułkoŭskaja pieraniesła zakančeńnie pracesu na 25 lipienia hetaha hoda.
Va UUS Centralnaha rajona Minska BiełaPAN paviedamili, što supracoŭnika z proźviščam Hryb u ich niama, i paraili źviarnucca va UUS Minskaha rajona. Va UUS Minskaha rajona paviedamili, što ŭ ich pracuje Michaił Hryb.
K.Łukašoŭ, nahadajem, byŭ zatrymany 19 śniežnia 2006 hoda. Jamu inkryminavali najezd na aŭtamabili na supracoŭnika milicyi 29 sakavika 2006 hoda, kali jon zabiraŭ V.Siŭčyka z adździaleńnia chirurhii 3-j kliničnaj balnicy Minska. U toj dzień nieviadomyja z paśviedčańniami supracoŭnikaŭ MUS sprabavali zatrymać Siŭčyka paśla jaho vypiski z balnicy nibyta za drobnaje chulihanstva, adnak z dapamohaj brata palityku ŭdałosia schavacca.
20 lutaha 2007 hoda K.Łukašoŭ byŭ pryznany sudom Leninskaha rajona stalicy vinavatym va ŭčynieńni złačynstva, praduhledžanaha art. 364 Kryminalnaha kodeksa (nasille ŭ dačynieńni da supracoŭnika milicyi pry vykanańni im słužbovych abaviazkaŭ). Jaho pryhavaryli da dvuch hadoŭ umoŭnaha źniavoleńnia z adterminoŭkaj vykanańnia prysudu na dva hady. Zatym zhodna z chadajnictvam abarony sprava była nakiravana na paŭtorny razhlad.