Siońnia zrobleny jašče adzin krok da zamacavańnia zakonam madyfikavanaj narkamaŭki. U parlamencie kažuć pra namier abaranić movu "ad razbureńnia dy svavolstva".
Kiraŭnik kamisii pa adukacyi Zdanovič, adzin z pramoŭteraŭ zakonu, patłumačyŭ, što dakument maje na mecie "navieści paradak u biełaruskaj movie i abaranić jaje ad razbureńnia dy svavolstva". Ź jahonych słoŭ, "adzinaja sproba navieści paradak u hetaj sfery paciarpieła niaŭdaču" ŭ 1998 hodzie. Miełasia na ŭvazie historyja, kali tahačasny Dziaržkamitet pa druku sprabavaŭ prycisnuć "Našu nivu" za "parušeńnie ahulnapryniatych praviłaŭ movy". Tady, adnak, redakcyja vyjhrała spravu ŭ haspadarčym sudzie.
Zaraz, jak bačym, rychtujecca macniejšy dručok. U kalidorach ułady ćvierdziać pra nieadchodnaść ustalavać "ahulnuju adkaznaść" za datrymańnie aficyjnych moŭnych praviłaŭ.
U vyniku siońnia parlamenckaja kamisija ŭchvaliła prajekt "Ab praviłach biełaruskaj artahrafii i punktuacyi" i rekamendavała jaho da pieršaha čytańnia na vosieńskaj sesii. Praces pajšoŭ...
Kaniešnie, taraškievicu ŭsio adno nia vyniščać darešty (kali ŭžo nie pašenciła z 1933 hodu, dyk zaraz i pahatoŭ). Ale jaje karystalnikam kryvi papsujuć.
Zrešty, na pytańnie varta hladzieć šyrej. Linhvistyka tut dla ŭładaŭ reč dziasiataja. Kali ŭžo na toje, dyk mienavita moŭnaja prablematyka mahła b stać hruntam nacyjanalnaj kansalidacyi, pra jakuju tak šmat havorać. Ale ž trymaj kišeń!.. Pracuje tatalnaja lohika aŭtarytarnaj dziaržavy: usio adroznaje — pad korań!
P.S. Siońniašniaje pasiedžańnie parlamenckaj kamisii, badaj, daje adkaz niekatorym udzielnikam dyskusii, vyklikanaj maim postynham "Kaho amonam, kaho — artahrafičnym zakonam". Kaniešnie ž, zakon prymajecca "z najlepšych mierkavańniaŭ". Chto b sumniavaŭsia!
