U pačatkovaj škole ŭ horadzie Ńjutaŭn (štat Kanektykut, heta na ŭschodzie ZŠA) zastrelena 26 čałaviek, u tym liku 20 dziaciej va ŭzroście ad 5 da 10 hadoŭ. U momant stralby ŭ škole
Pieršapačatkova było abvieščana, što ź dziećmi i supracoŭnikami škoły raspraviŭsia 24-hadovy Rajan Łanca. Potym infarmavanyja krynicy zajavili, što strałkom apynuŭsia 20-hadovy Adam Łanca, a jaho brata Rajana zatrymała palicyja. Pa słovach krynic, błytanina paŭstała z-za taho, što ŭ zabojcy pry sabie było paśviedčańnie asoby brata. Na svajoj staroncy ŭ Facebook Rajan paviedamiŭ, što heta zrabiŭ nie jon, a jon byŭ na pracy. Nieŭzabavie paśla hetaha palicyja zabrała jaho na dopyt. Paviedamlajecca, što jon, a taksama baćka bratoŭ Piter dajuć pakazańni i supracoŭničajuć sa śledstvam. Pa źviestkach SkyNews, Rajan paviedamiŭ palicyi, što nie mieŭ znosinaŭ z bratam ad 2010 hoda. Palicyja ličyć, što nichto z členaŭ siamji Adama da taho, što adbyłosia, nie maje dačynieńnia.
ŚMI paviedamlajuć, što Adam Łanca byŭ psichična nienarmalnym, mahčyma, aŭtystam, pakutavaŭ na rasstrojstva asoby. Bojniu jon učyniŭ, pasvaryŭšysia z maci.
Pišuć, što vučyŭsia jon vydatna, ale byŭ zamknutaj asobaj. Ścipły, uvieś u sabie, jon nie hladzieŭ ludziam u vočy.
Łanca pakutavaŭ na sindrom Aśpierhiera — parušeńnie asoby, blizkaje da aŭtyzmu. Adnak ekśpierty padkreślivajuć, što ništo nie pakazvaje na toje, što pryčynaj masavaha zabojstva stała jahonaja chvaroba.
Raniej paviedamlałasia, što svaju maci Adam zabiŭ u kłasie, dzie rasstralaŭ 20 dziaciej. Adnak paźniej palicyja ŭdakładniła, što jana była zabitaja doma. A paśla hetaha Adam z haroj zbroi, zarehistravanaj na jaje imia, pryjechaŭ u škołu. Na miescy złačynstva palicyjanty znajšli minimum try adzinki - pistalet aŭstryjskaj firmy Glock kalibra 9 mm, pistalet SIG-Sauer i vintoŭku Bushmaster kalibra 223.
U škole Adam zastreliŭ 20 vučniaŭ (18 pamierli na miescy, dvoje -- u balnicy) i šeść darosłych, u tym liku dyrektara škoły i psichołaha, i skončyŭ žyćcio samahubstvam.
Maci Adama 4 hady tamu raźviałasia z baćkam. Sama jana była apantanaj źbiralnicaj zbroi. U chacie ŭ ich była pieršakłasnaja kalekcyja. Jana časta praktykavałasia na strelbiščy razam z synami.
U bolšaści štataŭ ZŠA hramadzianie majuć prava nasić zbroju. Heta daŭniaja volnaść, z časoŭ zavajovy niezaležnaści. Na žal, u ciapierašnich umovach heta pryvodzić da častaj stralaniny ŭ publičnych miescach. Pa kolkaści zabojstvaŭ na dušu nasielnictva Štaty zastajucca siarod najhoršych u śviecie.
