U Minsku 18 śniežnia ŭ prysutnaści ministra abarony Biełarusi Juryja Žadobina, dyrektara Fiederalnaj słužby pa vajenna-techničnym supracoŭnictvie RF Alaksandra Famina, pasła Rasii ŭ Biełarusi Alaksandra Surykava padpisany kantrakt pamiž AAT «Karparacyja «Irkut» i Minabarony Biełarusi na pastaŭku ŭ 2015 hodzie čatyroch vučebna-bajavych samalotaŭ Jak-130.
Pra heta paviedamili ŭ
pres-słužbie abaronnaha viedamstva.
Dvuchmiesny vučebna-bajavy samalot Jak-130, raspracavany AKB imia A. S. Jakaŭleva, pryznačany dla asnoŭnaj i pavyšanaj padrychtoŭki lotčykaŭ frantavoj avijacyi. Samalot vyznačajecca vydatnaj manieŭranaściu i sučasnym bartavym radyjoelektronnym abstalavańniem, charakternym dla najnoŭšych bajavych samalotaŭ, a taksama vysokaj nadziejnaściu i praciahłym resursam.
Jak-130 źjaŭlajecca adzinym u śviecie vučebnym samalotam z aeradynamičnaj kampanoŭkaj i lotna-techničnymi charaktarystykami dahukavoha palotu, anałahičnymi sučasnamu reaktyŭnamu źniščalniku.
Samalot zdolny nieści da 3.000 kh bajavoj nahruzki (kiravanaje i niekiravanaje rakietnaje i bombavaje ŭzbrajeńnie, harmaty i h.d.) na dzieviaci vonkavych vuzłach padvieski.
AAT «Karparacyja «Irkut» vykonvaje kantrakt na pastaŭku 65 Jak-130 dla VPS Rasii.
Biełaruś stała pieršaj dziaržavaj — udzielnicaj SND, jakaja zakuplaje UBS Jak-130.
Nahadajem, 21 vieraśnia hetaha hoda, raskazvajučy žurnalistam pra vyniki sustrečy z prezidentam Rasii Uładzimiram Pucinym, biełaruski prezident Alaksandr Łukašenka adznačyŭ, što Rasija daść Biełarusi novyja sučasnyja samaloty dla achovy miažy. «U nas sumiesnaja SPA. My pa vajenna-pavietranych siłach abmierkavali šmat pytańniaŭ. Ja paprasiŭ padtrymki i jaje atrymaŭ. Najbližejšym časam my atrymajem sučasnyja samaloty, kab nieści dziažurstva na miažy», — cytavała Łukašenku dziaržaŭnaje ahienctva BiełTA. Jon rastłumačyŭ, što ŭ vajennych samalotaŭ, jakija maje Biełaruś, zakančvajecca resurs: «U vajenny čas my ich padniać možam, ale ŭ mirny čas patrebnyja novyja narmalnyja samaloty. My pra heta damovilisia. My svaju miažu razam z prezidentam Rasii damovilisia zabiaśpiečvać naležnym čynam».
Było mierkavańnie, što havorka idzie pra 18 źniščalnikaŭ Su-30, jakija stajali na ŭzbrajeńni indyjskaj armii i ciapier znachodziacca na 558-m avijaramontnym zavodzie ŭ Baranavičach. Heta avijatechnika naležyć AAT «Irkut». Adnak zatym ekśpierty źviarnuli ŭvahu na toje, što havorka idzie pra samaloty dla achovy miažy, dla niasieńnia dziažurstva na miažy. Dla hetaha padychodziać, naprykład, vučebna-bajavyjaJak-130, ale nijak nie ciažkija źniščalniki.
Darečy, u listapadzie 2007 hoda Irkucki avijacyjny zavod naviedaŭ tahačasny kiraŭnik urada Biełarusi Siarhiej Sidorski. U listapadzie 2009 hoda tam pabyvała delehacyja VPS i vojskaŭ SPA uzbrojenych sił Biełarusi na čale z adnym z namieśnikaŭ kamandujučaha. Jany aceńvali mahčymaść raźmiaščeńnia zamovy na pastaŭku Jak-130 dla biełaruskaj armii. A 3 žniŭnia 2010 hoda Ihar Azaronak, jaki zajmaŭ tady pasadu kamandujučaha VPS i vojskami SPA, na pres-kanfierencyi abviaściŭ, što biełaruskija vajennyja realna prapracoŭvajuć pytańnie ab nabyćci Jak-130.
BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
