Hety hod adznačyŭsia dla biełaruskaha kino vialikaj padziejaj. Upieršyniu film, źniaty pavodle biełaruskaj kłasiki režysioram, narodžanym u Biełarusi, i z udziełam biełaruskaj kinastudyi trapiŭ na Kanski fiestyval u asnoŭny konkurs.Heta «U tumanie» Siarhieja Łaźnicy, pavodle adnajmiennaj apovieści Vasila Bykava. Jašče adzin film — «Žyvie Biełaruś» — pakazali ŭ Kanach pa-za konkursam.
Niezaležny kiniematohraf adznačyŭsia paraj jaskravych filmaŭ, rasstaŭlać jakija pa pryzavych miescach nie vypadaje: stužki vielmi roznyja.
Kłasika: «U tumanie»
Heta prykład taho, jak stužka, zasnavanaja na biełaruskim, bolš za toje — vajennym materyjale, moža zacikavić śviet.
Łaźnica ŭbačyŭ kłasičny tvor Bykava pa-svojmu, navat dadaŭšy «ad siabie» epizody, jakija majuć całkam bykaŭski nastroj i charaktar. Łaźnica cikaviŭsia Bykavym jak piśmieńnikamekzistencyjalistam i sfakusavaŭsia na prablemie maralnaha vybaru ŭ situacyi, kali vybar niemahčymy.
Choć zdymaŭsia film nie ŭ Biełarusi, i sam Łaźnica nie ličyć siabie vyklučna biełaruskim režysioram, jon źniaŭ najlepšy nacyjanalny film za apošnija hady.
Ekranizacyja Vasila Bykava trapiła ŭ asnoŭny konkurs u Kanach, sabrała šerah uznaharodaŭ — ad hran-pry «Listapada» da Adesskaha kinafiestyvala.
Skandał: «Vyšej za nieba»
Film «Vyšej za nieba» režysiora Dźmitryja Marynina i scenarysta Andreja Kurejčyka — najhučniejšaja i najskandalniejšaja premjera hoda: adźniaty na srodki AAN vaśmisieryjny telefilm pra ŚNID zdymačnaja hrupa, biez zhody zamoŭcaŭ, pieramantažavała ŭ dźviuchhadzinny poŭny mietr. Adnak aŭtarskija pravy na jaho zastalisia ŭ AAN, jaki paŭnamietražnuju viersiju zabaraniŭ. Tady film «źlili» ŭ internet, dzie stužka zrabiła furor.
Historyja maładoha muzyki Mikity, u jakoha znajšli ŚNID, atrymała supraćlehłyja vodhuki.Častka hledačoŭ kaža, što heta sapraŭdnaje vostraje i aktualnaje kino, inšyja ž ličać «Vyšej za nieba» nadzvyčaj zaciahnutym. U film trapili ŭ jakaści kamiea mnohija kulturnyja dziejačy našaha času — ad Viktara Marcinoviča da Andreja Chadanoviča. A saŭndtrek «Vyšej za nieba» z udziełam «Lapisaŭ», Akute, Sonica isnuje jak paŭnavartasny albom.
Ekstrym: «Zdymać na paražeńnie»
Jašče adzin internet-reliz, jaki narabiŭ šumu, heta amatarski film 22-hadovaha režysiora Krysa Nonha (jon ža Kirył Nonh) «Zdymać na paražeńnie». Biudžet filma — usiaho tolki $2,5 tysiačy, doŭžycca jon 50 chvilin, ale stvorany ŭ sapraŭdnych halivudskich tradycyjach.
Pa jakaści karcinki nie sastupaje, a časam pieraŭzychodzić prafiesijny biełaruski kiniematohraf.Heta pryhodnicki film pra chłopca, jaki źbirajecca zdymać kino i vypadkova fiksuje apieracyju śpiecsłužbaŭ.
Zahadka: «Žyvie Biełaruś»
Film-tajamnicu pra žyćcio palitžaŭniera pa matyvach dziońnikaŭ Franaka Viačorki, źniaty polskim režysioram Kšyštafam Łukaševičam, masavy hladač jašče nie bačyŭ. Film trapiŭ na kinakirmaš Kanskaha fiestyvalu, była premjera ŭ Polščy, mały pakaz u Minsku — pra dalejšy los filma ničoha nie čutno. U internecie hulaje trejler — u asnoŭnym sceny Płoščy 2010 hoda. Pa słovach tych, kamu paščaściła film ubačyć, u im jość mastackija pierabolšvańni. Biudžet filma skłaŭ $1,9 miljona dalaraŭ. Internet-prezientacyja taksama pieranosiłasia niekalki razoŭ. Tamu «Žyvie Biełaruś» pakul moža ŭhanaravać tolki ŭ naminacyi «film-zahadka».
