Piać faktaŭ pra Ihara Karpienku 55

Imia namieśnika staršyni Minharvykankama Ihara Karpienki ciapier nieparyŭna źviazanaje ź biełaruskaj łacinkaj u mietro.

Hety čynoŭnik zaŭparciŭsia i patrabuje spynić " tranślitaracyju hieahrafičnych nazvaŭ, u tym liku, naprykład, stancyj mietro, ź biełaruskaj movy. «Naša Niva» sabrała piać faktaŭ ź jahonaj bijahrafii.

Sibirak

Ihar Karpienka naradziŭsia ŭ 1964 u Novakuźniecku. Heta sibirski horad niepadaloku ad Kazachstana i Manholii.

Adnak adukacyju jon atrymaŭ užo ŭ Minsku — u piedinstytucie. Karpienka moža być nastaŭnikam historyi, hramadaznaŭstva i anhlijskaj movy. Jość u jaho i druhaja adukacyja — u Akademii kiravańnia.

Paśla słužby ŭ vojsku Karpienka adrazu pačaŭ pracavać na ideałahičnych pasadach.

U piedahahičnym univiersitecie jon prajšoŭ ad pasady sakratara kamiteta kamsamoła da prarektara pa vychavaŭčaj pracy.

Pieršy sakratar

U biełaruskich čynoŭnikaŭ nie pryniata znachodzicca ŭ šerahach palityčnych partyj.

A Karpienka nie prosta partyjec, a jašče i sakratar (kiraŭnik) Kamunistyčnaj partyi Biełarusi. Arhanizacyju jon uznačaliŭ letaś.

«Niesumnienna, u asnovie našaj prahramy lažyć teoryja marksizmu-leninizmu… Heta partyja, jakaja siońnia prapahanduje idei hramadstva sacyjalnaj spraviadlivaści, na moj pohlad, my pavinny zaniać levy fłanh palityčnaj dziejnaści ŭ nas u Respublicy Biełaruś», — zajaviŭ jon paśla abrańnia. Darečy, u pałatu pradstaŭnikoŭ na letašnich vybarach prapuścili traich kamunistaŭ.

Nie curajecca Karpienka i «Biełaj Rusi». Jon braŭ aktyŭny ŭdzieł u letašnim źjeździe arhanizacyi.

Były deputat

Sam Karpienka byŭ deputatam parłamienta papiaredniaha sklikańnia. Ź ciaham času jon prabiŭsia ŭ staršyni kamisii pa mižnarodnych spravach i suviaziach z SND.

Karpienka jeździŭ pa Jeŭropie i aburaŭsia dziejańniami Zachadu.

«Vobrazna kažučy, ja ŭžo nie školnik, kab mnie z PARIE pahražali palcam, što my niešta nie tak robim,

— zajaviŭ jon padčas vizitu ŭ Francyju. — U nas stvorana pracoŭnaja hrupa, jakaja vyvučaje pytańnie ŭviadzieńnia maratoryja na śmiarotnaje pakarańnie. Rezalucyja PARIE tolki nanosić škodu vyrašeńniu hetaha pytańnia. U nas jość peŭnaja hramadzianskaja i čałaviečaja hodnaść, jakaja nie dazvalaje tryvać nastaŭleńnie z boku».

Krytykavaŭ Karpienka i «kartu palaka», inicyjavaŭšy jaje razhlad u parłamiencie: «Takim čynam, hramadzianin Biełarusi abaviazany ŭ svaich dziejańniach kiravacca intaresami inšaj dziaržavy, a nie svajoj krainy. Chiba heta nie ŭmiašańnie va ŭnutranyja spravy suvierennaj dziaržavy?

Chiba heta nie padryŭ situacyi znutry?»

Kiraŭnik vybarčaj kamisii

Padčas prezidenckaj kampanii-2010 Karpienka, jaki adkryta zaklikaŭ svaju partyju padtrymać Łukašenku, uznačaliŭ Minskuju vybarčuju kamisiju.

Jon asabista prychodziŭ na sustrečy apazicyjnych kandydataŭ z vybarcami i papiaredžvaŭ pra niezakonnaść takich akcyj.

U vyniku Minskaja vybarčaja kamisija zafiksavała, što ŭ stalicy za Łukašenku prahałasavała bolš za 67% čałaviek.

Misija Karpienki była paśpiachova vykananaja.

Vice-mer

U 2011 Łukašenka pryznačyŭ Karpienku, tady jašče deputata, namieśnikam staršyni Minharvykankama.

Z taho času ŭ śfieru jahonaha ŭpłyvu ŭvachodziać pytańni ideałohii, adukacyi, achovy zdaroŭja, sportu, turyzmu i sacyjalnaj abarony.

Kamunist staranna achoŭvaje aficyjnuju ideałohiju.

«My chočam siońnia syści ad pierajmienavańnia vulic, hety pieryjad my prajšli ŭ pačatku 1990-ych», — raskazvaŭ jon. Na pytańnie, čamu ŭ stalicy niama vulicy Vasila Bykava Karpienka adkazvaŭ, što ŭšanavańnie pamiaci nie abaviazkova pavinna adbyvacca praz nazvy vulic: «Ja b nie dramatyzavaŭ hetuju situacyju». Zatoje vulica Karła Marksa, na jaho dumku, patrebnaja, bo jahonyja pracy vyvučajucca ŭ mnohich univiersitetach śvietu. Achoŭvaje jon i skulptury Lenina:

«Pomniki znosiacca dla nastupnaj falsifikacyi historyi śpiecyjalna».

Ciapier ruki ŭradženca Novakuźniecka daciahnulisia da našaj rodnaj movy.

Jahor Marcinovič

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH