Maryna Adamovič, žonka palitviaźnia Mikałaja Statkieviča, atrymała list ad muža, ŭ jakim jon koratka tłumačyć, čamu ŭ raniejšych listach zakranuŭ takuju balučuju temu, jak pavodziny na Płoščy i paśla jaje niekatorych kandydataŭ u prezidenty.
«Jon piša, voś: «Daruj, što ŭciahnuŭ ciabie ŭ hetyja razborki, ale jany nieabchodnyja, bo ŭžo ŭ budučym hodzie realna pačniecca prezidenckaja kampanija i nielha dapuścić, kab ŭ joj udzielničali ci ŭpłyvali na jaje tyja, chto zhańbiŭ siabie padčas papiaredniaj. Dy i patencyjnyja kandydaty pavinny viedać, što ich dziejańni buduć potym publična razabranyja».
Dyskusija vakoł listoŭ byłoha kandydata ŭ prezydenty Mikałaja Statkieviča idzie ŭžo kala miesiaca. Sam Statkievič ličyć, što niekatoryja ź jahonych kalehaŭ-kandydataŭ 19 śniežnia minułaha hoda zdradzili pryniatym raniej damovam. I navat pajšli na supracoŭnictva z režymam Alaksandra Łukašenki, kab zastacca na voli.
Mikałaj Statkievič za padziei na Płoščy atrymaŭ 6 hadoŭ źniavoleńnia, palityka trymajuć ŭ mahiloŭskaj turmie. 23 lutaha Maryna Adamovič paviedamiła karespandentu radyjo "Svaboda", što čarhovym razam źbirajecca skardzicca ŭ prakuraturu na parušeńni pravoŭ palitviaźnia Mikoły Statkieviča.
