28 lipienia na kancercie hurtu «Akijan Elzy», jaki prachodziŭ u Horadni ŭ ramkach reklamnaha turu sotavaha aperatara «Velcom», specnazaŭcy złamali ruku chłopcu, jaki razharnuŭ nacyjanalny ściah. Paciarpieŭ za bieł-čyrvona-bieły štandar Alaksandar Šumkievič, adzin ź lideraŭ moładzievaj struktury Ab`iadnanaj hramadzianskaj partyi — «Maładyja demakraty».
U subotu, 28 lipienia, na kancercie hurtu «Akijan Elzy», jaki prachodziŭ u Horadni ŭ ramkach reklamnaha turu «Velcom»‑u, specnazaŭcy złamali ruku Alaksandru Šumkieviču, adnamu ź lideraŭ «Maładych demakrataŭ» — maładziožnaj struktury Ab`iadnanaj hramadzianskaj partyi.
Zdaryłasia za 15 chvilin da zakančeńnia kancertu, kali niekalki moładzievych aktyvistaŭ razharnuli bieł‑čyrvona‑bieły ściah nad natoŭpam. Da Šumkieviča zzadu prabilisia milicyjanty i ludzi ŭ štackim, załamali ruki i vyciahnuli z Savieckaj płoščy, dzie prachodziŭ kancert. Na prośbu Šumkieviča dać mahčymaść zabrać svoj zaplečnik, jany adkazali niekalkimi ŭdarami nahami. Paśla junaka dastavili ŭ Leninski RUUS Horadni i źmiaścili ŭ izalatar časovaha ŭtrymańnia. U pratakole ab zatrymańni fihuravała «tradycyjnaje» tłumačeńnie: niecenzurna łajaŭsia ŭ hramadzkim miescy.
«Ruka tak razbalełasia, — raskazvaje Aleś, što na nastupny dzień ja źviarnuŭsia da daktaroŭ».
Chłopiec padaŭ skarhu na dziejańni supracoŭnikaŭ milicyi. Jon maje prajści ahlad u biuro sudmedekspertyzy.
Heta nia pieršy vypadak, kali moładź u časie aficyjnych i kulturnych imprezaŭ uzdymaje ci zapuskaje ŭ nieba na šarykach nacyjanalnyja ściahi. Upieršyniu pry hetym junaku złamali ruku.
«Ja nia zdamsia biaz boju» — tak śpiavaje «Akijan Elzy». A Alaksandar praciahvaje navučańnie ŭ aŭtaškole, niahledziačy na hips.
