24 lipienia
U Žłobinie nie dazvalajuć
U šaści haradach Biełarusi aktyvisty prafsajuzu pracaŭnikoŭ radyjoelektronnaj pramysłovaści (REP) padali zajaŭki na praviadzieńnie sacyjalnych pikietaŭ suprać admieny lhot. Stała viadoma, što harvykankam Žłobina nia daŭ dazvoł na akcyju.
Napiaredadni 27 lipienia
Sud Centralnaha rajonu Miensku asudziŭ moładzievaha apazycyjnaha aktyvista Valancina Sakałoŭskaha na 10 sutak aryštu. Jaho abvinavacili ŭ drobnym chulihanstvie. Sud Centralnaha rajonu Miensku vynies vyrak zatrymanamu aktyvistu Alaksandru Čarnyšovu — 15 sutak aryštu. Saviecki sud pakaraŭ 10‑iu sutkami zatrymanaha napiaredadni Siarhieja Klujeva. Sudździa Savieckaha rajonu Ludmiła Savaścian vyniesła takoje pakarańnie za «zakliki da praviadzieńnia niesankcyjanavanaj akcyi». Akramia taho, supracoŭniki milicyi zatrymali Kaciu Suchardzinavu i jaje siabroŭku Maryju Sieruju, za rasklejvańnie nalepak z zaklikam da ŭdziełu ŭ mierapryjemstvach apazycyi ŭ Dzień niezaležnaści — 27 lipienia. Sud Savieckaha rajona pryznaŭ dziaŭčat vinavatymi pa artykule 17.1 Administratyŭnaha kodeksu Biełarusi («drobnaje chulihanstva») i aštrafavaŭ Kaciarynu Cuchardzinavu na 30 bazavych vieličyń, Maryju Sieruju — na 20 bazavych vieličyń.
Ščukinu pakinuli
Byŭ adchileny pratest dziaržaŭnaha abvinavaŭcy adnosna prysudu pravaabaroncu Valerju Ščukinu. Nahadajem, 8 červienia Pieršamajski rajonny sud Viciebsku vynies prysud Ščukinu — štraf 40 bazavych vieličyń. Jaho pryznali vinavatym u artykule 189 KK «Abraza členaŭ i rabotnikaŭ vybarčych kamisijaŭ).
25 lipienia
Pasadzili Šydłoŭskaha
Sud nad zatrymanymi 24 lipienia aktyvistami Paŭłam Baranoŭskim i Alaksiejem Šydłoŭskim byŭ pieraniesieny na 8 žniŭnia. Udzień Alaksieja Šydłoŭskaha zatrymali paŭtorna, da jaho dadomu pryjechali milicyjanty, dzie i adbyłosia zatrymańnie. Viečaram sudździa Partyzanskaha rajonu Alena Ciciankova pryznačyła pakarańnie Alaksieju Šydłoŭskamu ŭ vyhladzie 15 sutak aryštu.
ZŠA asudžajuć
ZŠA rašuča asudžajuć palityčna matyvavanaje źniavoleńnie palityčnych aktyvistaŭ Paŭła Sieviarynca i Alaksieja Šeina, jakim ułady vynieśli 24 lipienia pryhavor za raspaŭsiudžvańnie ŭlotak pra mitynh Abjadnanych demakratyčnych sił, zaplanavany na 27 lipienia.
Ivaškieviča papiaredžvali
Staršynia arhkamitetu pa śviatkavańni 27 Lipienia namieśnik staršyni Partyi BNF Viktar Ivaškievič byŭ vyklikany ŭ hałoŭnaje ŭpraŭleńnie ŭnutranych spravaŭ Mienharvykankamu. Ivaškieviča papiaredzili ab kryminalnaj adkaznaści ŭ vypadku praviadzieńnia 27 lipienia ŭ Miensku masavych akcyj.
26 lipienia
U Łukašova toje samaje
Prysud u dačynieńni Kastusia Łukašova,brata viadomaha palityka Viačasłava Siŭčyka, pakinuty biaź źmienaŭ (dva hady ŭmoŭna). Takoje rašeńnie pryniaŭ 26 lipienia sud Leninskaha rajonu Miensku.
Miron u honar Pleščanki
Minułaj nočču na ŭsich žyłych damach pa cotnym baku vulicy imia Valanciny Cieraškovaj u Viciebsku byli prymacavanyja šyldy «Vulica imia Ŭładzimiera Pleščanki».
Łukasiku nie dazvolili
Kalehija Mienskaha abłasnoha sudu pakinuła ŭ sile rašeńnie sudu Miadzielskaha rajonu pra vysyłku z krainy pastara evanhielskaj carkvy «Jan Pradvieśnik» Jarasłava Łukasika.
U Navapołacku pikiety
Navapołacak staŭ adzinym na siońniašni dzień horadam u krainie, u jakim ułady dazvolili pikiet u padtrymku byłoha kandydata na prezydenty, a ciapier palitviaźnia, Alaksandra Kazulina.
27 lipienia
Eŭrasajuz u abaronu Sieviarynca
Eŭrakamisar pa zamiežnych znosinach i palitycy dobrasusiedztva Benita Ferera‑Valdner zajaviła, što ŭstryvožanaja aryštami i zatrymańniami niekalkich udzielnikaŭ biełaruskaj demakratyčnaj apazycyi za apošni čas, u tym liku Paŭła Sieviarynca i Alaksieja Šeina.
Znoŭ Miron
Bieł‑čyrvona‑bieły ściah źjaviŭsia na dachu doma №41 pa praspekcie Frunze ŭ Viciebsku. U susiednim budynku pad numaram 41A mieścicca Viciebskaje abłasnoje ŭpraŭleńnie Ministerstva ŭnutranych spravaŭ.
Akcyja 27 lipienia
Niedaloka ad Čyrvonaha kaściołu byŭ zatrymany lider AHP Anatol Labiedźka. Taksama zatrymali i Viktara Ivaškieviča, ale praź niekatory čas abodvuch palitykaŭ adpuścili.
U halštuku, a brydkasłoviŭ
Moładzievy aktyvist Źmicier Chviedaruk sudom Maskoŭskaha rajonu Miensku byŭ asudžany da 10 sutak aryštu. Chłopca zatrymali 26 lipienia i abvinavacili ŭ brydkasłoŭi.
Upieršyniu na sutkach
Leninski rajonny sud Miensku asudziŭ na 15 sutak aryštu Jarasłava Hryščeniu, jon byŭ zatrymany 27 lipienia i mieŭ pry sabie ŭlotki z zaklikam pryjści na sustreču z deputatami Viarchoŭnaha Savietu 12‑ha sklikańnia, jakija prymali Deklaracyju ab dziaržaŭnym suverenitecie Biełarusi. Pakarali junaka za «niecenzurnuju łajanku». Franaka Viačorku sud Zavadzkoha rajonu pakaraŭ 7 sutkami aryštu za raspaŭsiudžvańnie ŭlotak. Abodva chłopcy ŭpieršyniu trapili na sutki.
