Staronka aryštavanaha ŭ Bostanie Carnajeva Ukantakcie: isłam i kaŭkazskija akcenty 31

U sacyjalnaj sietcy Ukantakcie zastajecca adkrytaj staronka padazravanaha va ŭčynieńni terakta na Bostanskim marafonie Džachara Carnajeva.

Jon byŭ padpisany na isłamskija — mirnyja — supołki. I žyŭ intaresami inšych suajčyńnikaŭ-kaŭkazcaŭ. Ale — siarod inšaha — źmiaściŭ videa pra pakuty i achviarnaść paŭstancaŭ u Siryi.

Za siońnia staronku pierapoŭnili sotni kamientaŭ ad surodzičaŭ, a taksama žycharoŭ Rasii i byłoha SSSR, na jaki prypadaje bolšaja častka aŭdytoryi hetaj sacyjalnaj sietki.

Džachara Carnajeva (abo Carni — kali dakładniej pa-čačensku) złavili ŭčora ŭviečary paśla pošuku, što doŭžyŭsia amal sutki.

Vybuch na finišy marafonu zdaryŭsia 15 krasavika. Na asnovie zapisaŭ kamier videanazirańnia palicyja skłała fotarobat padazravanych. Adrazu paśla hetaha adbyłasia čarada hvałtoŭnych padziej.

Spačatku stralanina vybuchnuła ŭ rajonie Masačusetskaha technałahičnaha instytuta. Tam zahinuŭ achoŭnik. Paśla palicyja vyjła na śled padazravanych u pradmieści Uotertaŭn. Adbyłasia pierastrełka. Staršaha z bratoŭ Carnajevych, 26-hadovaha, zabili. Mienšamu ŭdałosia syści ad pahoni.

Palicyja zahadała žycharam rajona zamknucca ŭ damach, zabłakavała mabilnuju suviaź i pračasała budynak za budynkam.

Džachara, jaki chavaŭsia ŭ łodcy, skmieciŭ adzin z žycharoŭ. Heta zdaryłasia paśla taho jak palicyja nikoha nie znajšła i adklikała zahad zastavacca ŭ damach. Čałaviek vyjšaŭ da svajho pryčała, a tam — akryvaŭleny mužčyna lažyć.

Jon vyklikaŭ palicyju.

Śpiecnaz prylacieŭ nieadkładna, na viertalotach.

Paśla abviaščeńnia pra aryšt u Bostanie radasnyja ludzi zapoŭnili vulicy horada.

Na finišy Bostanskaha marafonu adbylisia dva vybuchi, u vyniku jakich zahinuli try čałavieki, u tym liku vaśmihadovy chłopčyk, bolš za 200 atrymali ranieńni.

Siarhiej Hiezhała

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH