Žurnalisty Hałko i Jaraševič atrymali sutki. Fota svaboda.org
Dźmitryj Hałko
Sud nad zatrymanymi viečaram 6 maja žurnalistami Alaksandram Jaraševičam i Dźmitryjem «Budzimiram» Hałko mieŭsia raspačacca siońnia ranicaj 7 maja (pr-t haziety «Pravda», 27).
Ale ŭ sud ich pakul nie pryvieźli, niama kanvoju z Maskoŭskaha RUUSu, pra heta ŭ RUUSie skazali žoncy A. Jaraševiča.
11:22
U sud pryjechaŭ advakat Alaksandr Halijeŭ, jon byŭ advakatam A. Jaraševiča, kali taho sudzili paśla akcyi «Čarnobylski šlach».
11:37
U Maskoŭskim RUUSie kažuć, što paŭhadziny tamu mašyna z žurnalistami vyjechała, ale da suda nie dajechała pakul.
11:41
Pryvieźli ŭ sud.
11:42
U chole suda čakajuć imaviernyja «śviedki» zatrymańnia. Adzin ź ich toj, jaki sprabavaŭ zatrymać Aksanu Rudovič i Irynu Arachoŭskuju viečaram 26 krasavika.
Dźmitryja Hałko sudzić Jaŭhien Viktaravič Chatkievič, jaki znachodzicca ŭ śpisie asobaŭ, jakim zabaronieny ŭjezd u ES (№145 u śpisie).
Advakat pajšoŭ znajomicca sa spravaj.
Dźmitryja Hałko vinavaciać pa dvuch artykułach KoAP: 17.1 i 23.4. Sud na im maje raspačacca nieŭzabavie. Paśla suda nad Hałko projdzie sud nad Jaraševičam, bo advakat adzin i toj ža.
13:45
U spravie nad Hałko pierapynak da 15:15.
U 14 00 pavinien byŭ pačacca sud na Jaraševičam. Ale sudździa Matyl pajšła na inšy praces, skazali ŭ kancylaryi.
15:22
Adnaŭlajecca praces nad Hałko. Nad Jaraševičam jašče nie pačynaŭsia;
Vystupaje śviedka Žarski, jaki ŭdzielničaŭ pry zatrymańni Rudovič i Arachoŭskaj.
15:30
Sudździa zrabiŭ zaŭvahu dziažurnamu milicyjantu, kab sačyŭ za paradkam u sudovaj zali. A taksama Hałko za razmovy ŭ časie apytańnia śviedki.
15:40
Žurnalistam zabaranili karystacca mabilnymi telefonami.
16:40
Advakat Hałko ŭkazaŭ na supiarečnaści ŭ tłumačeńniach śviedak Viktara Žarskaha i Alaksieja Haroški. U pryvatnaści, na sudzie śviedčańni milicyjantaŭ supiarečyli dadzienym rapartaŭ. Milicyjanty śćviardžajuć, što ŭ raparcie mahła być abdrukoŭka.
Sud uziaŭ pierapynak dla vyniasieńnia prysudu Źmitru Hałko.
17:10
Sudździa Taćciana Matyl cikavicca ŭ Jaraševiča, što takoje «obiezjańnik». Bo žurnalist u svaich tłumačeńniach uzhadaŭ, što jaho z Hałko advieźli ŭ «obiezjańnik» paśla zatrymańnia.
Žurnalist źviartaje ŭvahu na niedakładnaści ŭ pratakole. U pryvatnaści, niapravilna paznačana miesca jaho naradžeńnia.
18:12
Žurnalist Źmicier Hałko asudžany na 10 sutak.
Hałko vinavacili ŭ niecenzurnaj łajancy i akazańni supraciŭleńnia milicyi. Pavodle hetych abvinavačvańniaŭ jamu prysudzili pa 7 sutak aryštu, pry hetym sud skasavaŭ častku pakarańnia.
18:44
U sudzie vyśvietliłasia, što pratakoły na Jaraševiča składalisia dvojčy (za adno i toje ž «parušeńnie»): pieršy — učora ŭviečary paśla zatrymańnia, a druhi – niepasredna pierad pačatkam słuchańniaŭ, paviedamlaje sajt HA «BAŽ». U druhim byli źmienienyja niekatoryja farmuloŭki. Advakat Alaksandr Halijeŭ miarkuje, što heta było zroblena paśla pracesu nad Hałko, pad čas jakoha «ŭspłyli» niekatoryja razychodžańni ŭ pakazańniach śviedkaŭ.
18:57
Sudździa Maskoŭskaha rajsuda Taćciana Matyl prysudziła Alaksandru Jaraševiču 12 sutak administratyŭnaha aryštu.
Jak i Hałko, jaho pryznali vinavatym u parušeńni dvuch artykułaŭ KaAP – 23.4 (niepadparadkavańnie milicyi) i 17.1 (chulihanstva).
***
Zatrymanych abvinavačvajuć u niepadparadkavańni supracoŭnikam milicyi.
Jaraševič i Hałko viartalisia viečaram u paniadziełak, 6 maja, z vulicy Akreścina, dzie sustrakali adpuščanych na volu asudžanych udzielnikaŭ akcyi «Čarnobylski šlach».Jak paśpieŭ paviedamić BAŽ Jaraševič, jany ŭžo padychodzili da stancyi mietro, kali pobač spyniŭsia milicejski mikraaŭtobus. Žurnalisty byli zatrymany biez tłumačeńnia pryčyn.
Heta ŭžo druhoje zatrymańnie Alaksandra Jaraševiča za apošnija 10 dzion. Viečaram 26 krasavika jon byŭ zatrymany paśla «Čarnobylskaha šlachu» razam sa svaim kaleham Hienadziem Barbaryčam. 29 krasavika sud Savieckaha rajona Minska pryhavaryŭ žurnalistaŭ da troch sutak aryštu na padstavie artykuła 23.4 KoAP (niepadparadkavańnie zakonnym patrabavańniam słužbovaj asoby pry vykanańni słužbovych abaviazkaŭ).
