Staršynia KDB Valery Vakulčyk i pamočnik prezydenta pa nacyjanalnaj biaśpiecy, starejšy syn kiraŭnika krainy Viktar Łukašenka buduć kuryravać kamisiju, jakaja acenić perspektyvy sumiesnaha z Rasiejaj ekspartu kalijnych uhnajeńniaŭ. Kamisiju ačolić staršynia praŭleńnia AAT «Bank raźvićcia Biełarusi» Siarhiej Rumas.
Takoje rašeńnie pryniaŭ Alaksandar Łukašenka, jaki ličyć nieabchodnym uzmacnić adziny kanał handlu kalijnymi ŭhnajeńniami. Stvoranaja im kamisija pavinna ŭnieści admysłovyja prapanovy.
«Vy viedajecie, što ŭ svoj čas my stvaryli sumiesnuju kampaniju pa realizacyi kalijnych uhnajeńniaŭ — Biełaruskuju kalijnuju kampaniju, jakaja była stvorana pa maim patrabavańni, tamu što ja bačyŭ, jak tady handlavali. Handlavali praź niekalkich žulikaŭ, jakija siadzieli ŭ Maskvie ŭ trochpakajovaj kvatery i varočali miljonami ton kalijnych uhnajeńniaŭ i, jak potym vyjaviłasia, miljardami dalaraŭ», — zajaviŭ Łukašenka-starejšy.
Biełaruskaja kalijnaja kampanija trymaje bolš za 40% usiaśvietnaha rynku kalijnych uhnajeńniaŭ.
«Ale, jak zaŭsiody, uźnikaje šerah pytańniaŭ, asabliva kali idzie supracoŭnictva ź inšymi kampanijami, zamiežnymi. I ŭzmacniaje hetyja prablemy toje, što ź inšaha boku ŭ nas pryvatnyja kampanii. Pryvatnik umieje ličyć hrošy, jon trymajecca za kožny cent realizavanaj pradukcyi. I, bolš za toje, pryvatnik zdolny na niekatoryja inšyja rečy, jakija ŭ nas nazyvajucca nie zusim dobrasumlennaj kankurencyjaj, machinacyjami i hetak dalej. Tamu, z adnaho boku, u ahulnym jość sens u supracoŭnictvie z pryvatnaj kampanijaj, ź inšaha — jość peŭnyja prablemy», — adznačyŭ Łukašenka.
Padčas sustrečy z Łukašenkam asnoŭny akcyjaner «Urałkaliju» Sulejman Kierymaŭ vykazaŭ pažadańnie, kab kamisija była abjektyŭnaj i kuratarstva nad joj uziaŭ «chtości vielmi ŭpłyvovy», adznačyli ŭ prezydenckaj pres-słužbie.
