Ekspart biełaruskaj techniki skaraciŭsia na sotni miljonaŭ dołaraŭ 1

Ekspart biełaruskich inviestycyjnych tavaraŭ, da liku jakich adnosicca pradukcyja mašynabudavańnia, z pačatku hoda skaraciŭsia na sotni miljonaŭ dołaraŭ u paraŭnańni z anałahičnym letašnim pieryjadam.

Jak śviedčać statystyčnyja źviestki, u studzieni-krasaviku 2013 hoda ekspart biełaruskich inviestycyjnych tavaraŭ skłaŭ 1,28 młrd. dołaraŭ i skaraciŭsia ŭ paraŭnańni z anałahičnym pieryjadam 2012 hoda na 22,8%.

Najbolšaje źnižeńnie adbyłosia pa hruzavych aŭtamabilach.

U studzieni-krasaviku na źniešnija rynki Biełaruś pastaviła 2.230 hruzavych aŭtamabilaŭ (na 49,1% mienš, čym za anałahičny letašni pieryjad) na 295,3 młn. dołaraŭ (źnižeńnie ŭ hrašovym vyražeńni na 44,6%).

Surjozna źnizilisia pastaŭki na źniešnija rynki i inšych inviestycyjnych tavaraŭ.

Tak, u studzieni-krasaviku Biełaruś pastaviła na ekspart 23,9 tys. traktaroŭ i siedłavych ciahačoŭ (na 21,5% mienš u paraŭnańni z anałahičnym letašnim pieryjadam), u hrašovym vyražeńni ekspart skaraciŭsia na 22,4%.

Adbyłosia taksama źnižeńnie ekspartu inšaj sielhastechniki (mašyn i miechanizmaŭ dla ŭborki i abmałotu sielhaskultur). Pastaŭki hetaj techniki ŭ fizičnym vyražeńni skaracilisia na 12,4%, u hrašovym — na 16,2% da 133,2 młn. dołaraŭ.

Biełaruskija ekanamisty tłumačać źnižeńnie ekspartu inviestycyjnych tavaraŭ padzieńniem popytu na rasijskim rynku zbytu.

«Situacyja na rasijskim rynku niespryjalnaja: nazirajecca stahnacyja ŭnutranaha popytu, źnizilisia abjomy pramvytvorčaści, rostu inviestycyj u asnoŭny kapitał nie nazirajecca. Viadoma, usio heta pryviało da taho, što popyt na biełaruskija inviestycyjnyja tavary źniziŭsia», — zaznačyła dyrektar daśledčaha centra IPM Iryna Tačyckaja.

Namieśnik staršyni Biełaruskaj navukova-pramysłovaj asacyjacyi Hieorhij Hryc bačyć pryčyny źnižeńnia ekspartu biełaruskaj sielhastechniki ŭ tym, što ŭ siońniašnich niaprostych ekanamičnych umovach Rasija stała padtrymlivać miascovych vytvorcaŭ.

Što da hruzavych aŭtamabilaŭ, zaznačaje ekśpiert, to prablemy sa zbytam biełaruskaj pradukcyi źviazany z uviadzieńniem u Rasii novaha ekałahičnaha standartu Jeŭra-4.

«Jašče adna pryčyna źnižeńnia biełaruskaha ekspartu, bolš ahulnaja, — ustupleńnie Rasii ŭ SHA, što pryviało da bolš žorstkaj kankurencyi na rasijskim rynku», — kanstatuje Hryc.

Niahledziačy na źnižeńnie ekspartu ŭ pieršyja miesiacy hetaha hoda, urad płanuje vypravić situacyju pavodle vynikaŭ studzienia-vieraśnia. Vice-premjer Piotr Prakapovič u krasaviku zajaviŭ, što ŭžo pavodle vynikaŭ dzieviaci miesiacaŭ urad maje namier «vyjści na realnaje vykanańnie ŭsich pakazčykaŭ dla pramysłovaści, hałoŭny siarod jakich — naroščvańnie ekspartu nie mienš jak na 15% za hety hod».

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH