Handlovy centr «Pasaž» sustrakaje naviedvalnikaŭ ciomnymi kalidorami, apuščanymi raletami i abviestkami pra strajk pradprymalnikaŭ 27 červienia.
Handlovy centr «Pasaž» sustrakaje naviedvalnikaŭ ciomnymi kalidorami, apuščanymi raletami i abviestkami pra strajk pradprymalnikaŭ 27 červienia.
Uładalnicy kramak u HC «Atłantyk» abmiarkoŭvajuć ahulnanacyjanalny strajk drobnych pradprymalnikaŭ.
U bolšaści adkrytych kramak siońnia ničoha nie pradajuć.
Pradprymalniki z HC «Atłantyk».
Pradprymalniki z HC «Atłantyk».
U handlovym centry «Parkinh» na pracu siońnia nie vyjšli amal usie pradprymalniki.
Začynienyja kramki HC «Parkinh».
Handlovy centr «Impuls» pracuje ŭ zvyčajnym režymie.
27 červienia drobnyja pradprymalniki abvieścili ahulnanacyjanalny strajk. Pastanovu ab jaho praviadzieńni pryniaŭ Forum pradprymalnikaŭ, pryśviečany pytańniam ukaranieńnia techničnaha rehłamientu Mytnaha sajuza «Ab biaśpiecy pradukcyi lohkaj pramysłovaści».
Zhodna z hetym rehłamientam, PUPy pavinny mieć siertyfikaty na ŭvieś tavar, a z 1 lipienia 2014 hoda takija siertyfikaty buduć patrabavać i ad IP. Pradprymalniki śćviardžajuć, što taki padychod stavić ich u niaroŭnyja ŭmovy — u Rasii takoha supravadžeńnia nichto nie patrabuje.
Karespandent «NN» prajšoŭsia pa Kamaroŭcy — najbolšym handlovym rajonie ŭ Minsku — i pahladzieŭ, jak prachodzić strajk.
HC «Pasaž»
U hetym handlovym centry, jaki składajecca z adnoha doŭhaha kalidora z kramkami paabapał badaj što pałova raletaŭ apuščanaja. Za vitrynami niekatorych kramaŭ zamacavany arkušy papiery, jakija śmieła paviedamlajuć, što siońnia kramka začynienaja praz strajk pryvatnych pradprymalnikaŭ. Adnak bolšaść začynienych dziavnych prajomaŭ upryhožvajuć cydułki «pajechała za tavaram», «pierapynak 5 chvilin», «pierapadlik».
U adnoj z adkrytych kramaŭ pytajemsia: «Vy nie strajkujecie siońnia?»
«Tut siońnia ŭsie strajkujuć. Prosta niekatorych paprasili vyjści na pracu i adamknuć kramku. A tak siońnia ničoha nikomu nie pradajem», — adkazała pradavačka.Adnak pradavačka inšaj adkrytaj kramy paciskaje plačami i paviedamlaje, što handlovy punkt — nie jaje ŭłasnaść, a haspadar nie padtrymlivaje strajku i zahadaŭ vychodzić na pracu. Toje ž samaje kažuć i ŭ inšych adkrytych kramkach.
HC «Atłantyk»
Pamiž šerahami kramaŭ, raźmieščanych pad adnym sa šmatlikich parkinhaŭ, prahulvajucca niešmatlikija naviedvalniki. U «Atłantyku» situacyja prykładna takaja ž, jak i ŭ «Pasažy»: pałova kramaŭ zamkniona na pierapadlik ci prosta biez paviedamleńnia pryčyny. Adnak u «Pasažy» niekalki hrupak pradprymalnikaŭ pjuć kavu i niešta abmiarkoŭvajuć. Kali jany daviedvajucca pra prysutnaść pradstaŭnika ŚMI, jana značna ažyŭlajucca i pačynajuć prasić aśviatlić strajk jak maha šyrej.
Pytajemsia: «Skažycie, a čamu vy nie paviedamlajecie pra strajk, nie raźviešvajecie infarmacyju na vitrynach»?
«My b paviedamlali, dy kiraŭnictva centra skazała, što kali niešta takoje ŭbačać — skasujuć damovu arendy», — adkazvajuć jany.
Pradprymalnica Ina paviedamiła, što siońnia ŭ «Atłantyku» taksama strajkuje bolšaść «pryvatnikaŭ». «Chto nie zamknuŭ kropku, dyk ničoha nie pradaje. Pracujuć tolki tyja, chto vystaviŭ maniekieny — toj pracuje.
Nie razumieju ich, bo my ž strajkam pakazvajem svaju salidarnaść. Nu „papracujem“ my adzin dzień „u nul“, ničoha z nami nie zdarycca. Jany ž za siońnia troški zarobiać, ale jaki ŭ hetym sens, kali praz apošnija narmatyvy rentabielna pracavać stanie nielha», — kaža Ina.
Pradprymalniki sychodziacca na tym, što treba pajści i paprasić «adkrytych» začynicca. «My takich padčas strajku ŭ 2008 hodzie farbaj palivali», — dadaje Ina i pačynaje niekamu aktyŭna telefanavać. «
Na Ždanovičach siońnia nichto nie pracuje. Tam telebačańnie niejkaje, chodzić čałaviek z kanistraj bienzinu, na vypadak, kali niechta zachoča papracavać, — śmiajecca Ina. — Dziaŭčyny z HC „Na Niamizie“ taksama nie pracujuć».
Uładalnica kramki pa prodažu spodniaj bializny, adna ź niešmatlikich, što siońnia «vystavili maniekieny», kaža što nie bačyć pryčyny hublać svaje hrošy.
«Ja była na schodzie pradprymalnikaŭ i paviedamiła ŭsim svaju pazicyju. Ja liču, što hetaha dastatkova», — kaža jana.
Pad kaniec pradprymalnica Taćciana hučna raić: «Zdymajcie, zdymajcie hetyja šerahi začynienych kramaŭ! I vydajcie pad zahałoŭkam „Tak moža być zaŭsiody“!»
«Vy b schadzili ŭ handlovy centr „Parkinh“. U ich siońnia 100% na pracu nie vyjšła. Tolki niejkija dyski pradajuć», — paviedamlajuć pradprymalniki.
HC «Parkinh»
U «Parkinhu» sapraŭdy ŭsie zajmajucca pieraraźlikam, pryjomkaj tavararu ci syšli na piacichvilinny pierapynak — u handlovym centry niama ni pradaŭcoŭ, ni kupcoŭ. Tolki čałaviek kaŭkazskaha vyhladu z mocnym akcentam paprasiŭ sfatahrafavać jaho kalehu, jaki pradaje «łuččij diski vi Minskie».
HC «Impuls»
Adnak u handlovym centry «Impuls» situacyja dyjamietralna procilehłaja: usie kramy adčynienyja, usie pradajuć tavar.I kali mnohija pryvatnyja ŭnitarnyja pradpryjemtsvy i nie źbiralisia strajkavać, dyk pryvatnyja pradprymalniki ŭ «Impulsie» taksama nie vyhladajuć salidarnymi z ahulnanacyjanalnym «pierapadlikam». I nie vielmi žadajuć raskazvać, čamu.
«A navošta strajkavać, heta ničoha nie źmienić, nie pryniasie nijakoha efiektu. Navošta mnie hublać svaje hrošy, kali ja zapłaciŭ padatki i apłaciŭ arendu, ale nie handluju?» — nieachvotna dzielicca uładalnik punktu prodažu dekaratyŭnaj kaśmietyki.
Pradavačka z hetaha ž punktu akazałasia bolš havarkoj i paviedamiła, što «Impuls» nie strajkuje praz pahrozu skasavańnia damovy arendy.
«Viedajecie, u nas pierad siońniašnimi padziejami kiraŭnictva centra ŭzmacnili kantrol. Chodziać pa kramkach, praviarajuć, ci handlujuć ludzi, ci nie. Skazali, što kali nie vyjdziem na pracu, zhubim miesca. Navat kali siońnia spoźnimsia na 5 chvilin», — kaža jana.
