9 lipienia, pryblizna, a 18-j hadzinie, na moście pa vulicy Pijanierskaj kiroŭca mikraaŭtobusa pieramiaščaŭsia ŭ inšuju pałasu i na chutkaści sapchnuŭ «Opiel Astra» na pałasu sustrečnaha ruchu. Tam «Opiel» sutyknuŭsia z «Mersedesam». Kiroŭca mikraaŭtobusa «Opiel Vivara», jaki spravakavaŭ avaryju, pajechaŭ dalej, piša «Briestskaja hazieta».
U vyniku avaryi na miescy zahinuŭ 35-hadovy pasažyr «Opiela». U jaho 28-hadovaha kiroŭcy, žychara Bresta, zakryty pierałom nižniaj skivicy, rezanaja rana padbarodździa, zakryty pierałom levaha kalennaha sustava.
26-hadovy kiroŭca «Mersedesa» špitalizavany z zakrytaj čerapna-mazhavoj traŭmaj, strasieńniem hałaŭnoha mozhu i pierałomami nahi.
«U chodzie praviadzieńnia vyšukovych mierapryjemstvaŭ stali viadomyja aŭtamabil i kiroŭca, datyčnyja da DTZ. Mikraaŭtobus „Opiel Vivara“ naležyć 44-hadovamu žycharu Bresta, jaho zatrymali», — raskazała «BH» načalnik adździaleńnia ahitacyi i prapahandy UDAI Bresckaha abłvykankama Natalla Sacharčuk. Jana dadała, što ŭsie kiroŭcy majuć paśviedčańni i ŭsie byli ćviarozyja.
Jak paviedamiŭ «BH» aficyjny pradstaŭnik upraŭleńnia Śledčaha kamiteta pa Bresckaj vobłaści, pa hetym fakcie 10 lipienia zaviedziena kryminalnaja sprava pa č.2 art. 317 «Parušeńnie praviłaŭ darožnaha ruchu abo ekspłuatacyi transpartnych srodkaŭ, što paciahnuła pa nieaściarožnaści śmierć čałavieka abo naniasieńnie ciažkaha cialesnaha paškodžańnia».
