Praca bankaŭskaj sistemy Biełarusi, situacyja na finansavym i valutnym rynkach stała 19 lipienia asnoŭnaj temaj dakłada staršyni praŭleńnia Nacyjanalnaha banka Nadziei Jermakovaj Alaksandru Łukašenku.
Pavodle źviestak
Dadatkovy ekanamičny efiekt u płanie źniešniehandlovaj dziejnaści i inviestycyj čakajecca i pavodle vynikaŭ vizitu biełaruskaj delehacyi ŭ KNR, padčas jakoha dasiahnuty dvuchbakovyja damoŭlenaści na ahulnuju sumu pryblizna 1,5 młrd. dołaraŭ. Baki majuć namier taksama aktyvizavać inviestycyjnaje supracoŭnictva, jakoje ŭžo siońnia aceńvajecca ŭ miljardy dołaraŭ. «Kitajskija partniory abiacali, što ź inviestycyjami ŭ nas prablem nie budzie, u ich jość hrošy, jany b chacieli inviestavać u našu ekanomiku», — adznačyŭ biełaruski kiraŭnik.
«My pavinny iści tym kursam, jaki my vyznačyli. Ni ŭ jakim razie ničoha štučna nie pavinny rabić: ni ŭtrymlivać, ni devalvavać, ni nacyjanalizavać, ni pryvatyzavać. Jak my abiacali, tym kursam i pavinny iści, jak išli dahetul. Nasielnictva i subjekty haspadarańnia pavinny razumieć: popyt vialiki — cana bolšaja, maleńki ci jaho niama — cana mienšaja, u tym liku i valuty. Hrošy — heta taksama tavar», — padkreśliŭ Łukašenka.
Jon papiaredziŭ kiraŭnika Nacbanka pra niedapuščalnaść emisijnaha kredytavańnia ekanomiki: «Nadrukavać i ŭkinuć niejkija šalonyja hrošy — hetaha być nie pavinna ni ŭ jakim razie».
Jermakova adznačyła, što situacyja na finansavym i valutnym rynkach, a taksama ŭ cełym u bankaŭskaj sistemie krainy zastajecca stabilnaj. Bankaŭskaja sistema zdolnaja vykonvać svaje funkcyi pa kredytavańni ekanomiki i absłuhoŭvańni nasielnictva, u tym liku ŭ častcy prodažu valuty. Nacbank rehularna adsočvaje situacyju ŭ abmiennych punktach. «Niahledziačy na toje, što dzieści chtości imkniecca pakazać, što jość čerhi, situacyja narmalnaja. Banki svaju funkcyju vykonvajuć, i valuty dosyć, najaŭnaj u tym liku, — zajaviła kiraŭnik Nacbanka. — Dosyć srodkaŭ i dla farmiravańnia zołatavalutnych reziervaŭ, vypłat pa daŭhavych abaviazacielstvach».
Pavodle słoŭ Jermakovaj, u śfiery źniešniaha handlu nazirajecca źnižeńnie debitorskaj zavinavačanaści, a valutnaja vyručka ŭ červieni pieravysiła vynik papiaredniaha miesiaca.
Kiraŭnik Nacbanka stanoŭča acaniła pierśpiektyvy raźvićcia inviestycyjnaha supracoŭnictva Biełarusi z KNR: «Padpisana šmat kantraktaŭ, u tym liku ekspartnych, inviestycyjnych, pa vytvorčaści ŭ našaj respublicy tavaraŭ, jakija potym pojduć na ekspart».
Abmiarkoŭvałasia taksama pytańnie pra vydzialeńnie kitajskim bokam nieźviazanaha kredytu dla papaŭnieńnia zołatavalutnych reziervaŭ Biełarusi. «My spadziajemsia, što na sustrečy premjeraŭ našych krain jon budzie ŭžo kančatkova daviedzieny da łahičnaha zaviaršeńnia», — zajaviła Jermakova.
