Nadzvyčajnaja sytuacyja ŭ Horadni. U Nioman trapiła vialikaja kolkaść chimičnaha rečyva, jakoje nahadvaje mazut. Maślanistyja plamy, padobnyja na mazut, pieršymi zaŭvažyli rybaki. Jany ž i paviedamili ratavalnikam i ekolaham. Rataŭničyja pracy vialisia praktyčna ŭsiu noč na 6 žniŭnia. Ratavalniki razam z ekolahami sprabavali ačyścić pavierchniu Niomana ad maślanistaj plonki.

Jak vyśvietliłasia, amal dźvieście litraŭ chimičnaha rečyva vyliłasia z truby vadazaboru vytvorčaha abjadnańnia «Biełkard». Jana była pabudavanaja pry kancy vaśmidziasiatych i z taho času nie vykarystoŭvałasia. Supracoŭniki kamitetu achovy navakolnaha asiarodździa ŭziali proby dla praviadzieńnia chimičnaha analizu. Dakładny skład vykidu admysłoŭcy zmohuć vyznačyć tolki praz tydzień.

Papiarednija dośledy pakazali, što ŭ skinutych u Nioman ściokavych vodach jość naftapradukty i syntetyčna aktyŭnyja rečyvy, tak zvanyja spamy.

Na hety momant usie rataŭničyja pracy skončanyja. Pracaŭniki vadakanału pradpryjemstva «Biełkard» robiać ačystku bierahavoj pałasy ad reštak zabrudžvańnia. Ekolahi padličvajuć škodu j čakajuć na vyniki chimičnych analizaŭ.

Stvoranaja admysłovaja kamisija dla vyśviatleńnia pryčyn avaryi. Razhladajucca roznyja versii. Na niekatorych učastkach akvatoryi Niomana jašče bačnyja reštkavyja pajavy zabrudžvańnia. Specyjalisty ćvierdziać, što niesankcyjanavany vykid nie ŭjaŭlaje nijakaj niebiaśpieki dla susiednich dziaržaŭ. Pavodle infarmacyi dziažurnaha pamiežnaj zastavy «Pryvałka», vodnaja hładź Niomana na miažy ź Litvoj čystaja.

ANT

Клас
Панылы сорам
Ха-ха
Ого
Сумна
Абуральна