7 rajonaŭ Viciebskaj vobłaści vakoł ačaha (filija AAT «Łučosa» ŭ ahraharadku Kopci pobač ź Viciebskam) pryznanyja niespryjalnymi zonami pa afrykanskaj čumie śviniej. U suviazi z hetym usich niezabitych nasielnictvam śviniej tut buduć adbirać. Astatnija rajony pa ŭsioj vobłaści abvieščanyja bufiernymi zonami pa AČS, vyrazać ŭsich śviniej u padsobnych haspadarkach jakich nasielnictvu pakul tolki rekamiendujuć.
Jak raspaviali ŭ Kamitecie pa sielskaj haspadarcy i charčavańni Viciebskaha abłvykankama, u asabistaj padsobnaj haspadarcy pa ŭsioj vobłaści śviniej nie pavinna być. Rašeńnie abłvykankama ab źniščeńni ŭsich śviniej va ŭsich pryvatnikaŭ było pryniata ŭ ramkach baraćby z afrykanskaj čumoj śviniej.
Niespryjalniami pryznanyja 7 rajonaŭ vakoł ačaha AČS ŭ Viciebskim rajonie — za 100 kiłamietraŭ ad jaho. Heta Haradocki, Šumilinski, Biešankovicki, Sieńnienski, Loźnienski, Dubrovienski, Aršanski rajony vobłaści.U hetych prablemnych rajonach u tych, chto nie zabje svaich śviniej, žyvioły buduć adbiracca. «Ale tut vialikaja praca zroblenaja, dyk voś, śviniej zastałosia mała», — skazaŭ čynoŭnik Viciebskaha abłvykankama.
U bufiernaj zonie (astatnich rajonach Viciebskaj vobłaści — Brasłaŭskim, Vierchniadźvinskim, Hłybockim, Dokšyckim, Lepielskim, Miorskim, Połackim, Pastaŭskim, Rasonskim, Tałačynskim, Ušackim, Čašnickim i Šarkoŭščynskim) možna zabić śviniej dla ŭłasnych patreb.
Asnoŭnaja prablema, kažuć śpiecyjalisty, u suviazi z AČS — ź dzikami, jakija pierasoŭvajucca bieskantrolna. Jany — asnoŭnyja raznosčyki zachvorvańnia. «Pa mahčymaści ŭ ramkach baraćby budzie źniščana 100% dzikoŭ», — skazali ŭ Kamitecie pa sielskaj haspadarcy i charčavańni Viciebskaha abłvykankama.
Infarmacyja ab nieabchodnaści vyrazać usich śviniej pryjšła ŭ redakcyju z Ušackaha, Čašnickaha, Sieńnienskaha rajonaŭ Viciebskaj vobłaści.
Na tydni zonami, u jakich pavinna być vyrazana ŭsio pahałoŭje śviniej, pryznanyja 4 rajony Bresckaj vobłaści. Z 1 žniŭnia ŭstupili ŭ siłu papraŭki ŭ vieterynarnyja praviły, jakija zabaraniajuć trymać śviniej nie mienš jak u 5 kiłamietrach ad śvinakompleksaŭ. Vyroščvać hetych žyvioł taksama zabaroniena rabotnikam śvinakompleksaŭ.
