Sarvali madernizacyju: troch supracoŭnikaŭ Minenierha čakaje sud 7

Śledstva ŭ adnosinach da Eduarda Taŭpianca adkłali da jaho vyzdaraŭleńnia.

Siońnia hazieta «Sovietskaja Biełoruśsija» nadrukavała pradstaŭleńnie staršyni Śledčaha kamiteta Valancina Šajeva ministru enierhietyki Uładzimiru Patupčyku.

Sprava tyčycca madernizacyi Biarozaŭskaj DRES. Viasnoj na hetuju temu vykazvaŭsia asabista Alaksandr Łukašenkam. Haziety strakacieli zahałoŭkami kštałtu «Sarvany płan madernizacyi Biarozaŭskaj DRES».

U vyniku ministr enierhietyki Alaksandr Aziarec i jahony namieśnik Eduard Taŭpianiec byli adpraŭlenyja ŭ adstaŭku, ale ničoha nie havaryłasia, što na druhoha zaviali kryminalnuju spravu.

Siońnia ž u Śledčym kamitecie ahučyli infarmacyju, što sprava prypynienaja i budzie praciahnutaja, kali Taŭpianiec vylečycca ad chvaroby (jakoj, nie paviedamlajecca).

Materyjały ž na dvuch druhich fihurantaŭ hetaj spravy pieradadzienyja ŭ sud. «SB» drukuje pradstaŭleńnie Šajeva ź pieraściarohaj inšym čynoŭnikam, jakim treba ŭličyć sumny dośvied Minenierha, asabliva ŭ pytańni dziaržzakupaŭ.

Na łavu padsudnych siaduć były načalnik upraŭleńnia materyjalna-techničnych resursaŭ i vytvorčaj infrastruktury «Biełenerha» Hoŭzič, jaki byŭ staršynioj konkursnych kamisij pa zakupie abstalavańnia dla patreb Biarozaŭskaj DRES, a taksama były dyrektar «Biełenierhasnabkamplekt» Žukaŭ. Na ich, a taksama Eduarda Taŭpianca, zaviedzienaja kryminalnaja sprava pa č. 3 artykuła 426 (pieravyšeńnie słužbovych paŭnamoctvaŭ).

Machinacyi adbylisia padčas tarhoŭ na zakupku paraturbinnaj ustanoŭki dla DRES. Arhanizoŭvaŭ tarhi Žukaŭ, a Hoŭzič byŭ staršynioj kamisii. Paviedamlajecca, što Hoŭzič nie davaŭ słova dla vystupleńnia samim zakazčykam, jakija byli niezadavolenyja prapanovaj «Ciepłaenierhaservisa-EK» (Jekaciarynburh).

Pry pieršym hałasavańni pa hetaj prapanovie šmat členaŭ konkursnaj kamisii ŭstrymałasia, tady ŭ pierapynku Hoŭzič dałažyŭ situacyju Taŭpiancu, jaki zapatrabavaŭ ad pradstaŭnikoŭ «Biełenierha» i «Biełenierhasnabkamplekt» hałasavać albo «za», albo «suprać».

«Takim čynam, pry praviadzieńni tarhoŭ było dapuščanaje ŭmiašalnictva ŭ dziejnaść kamisii i ŭciečka infarmacyi ab jaje pracy. Pa vynikach tarhoŭ Žukavym V.P. zaćvierdžana rašeńnie kamisii ab pryznańni pieramožcam AAT „Ciepłaenierhaservis-EK“ na prapanavanych arhanizacyjaj ŭmovach dahavora, jakija nie tolki nie adpaviadali, ale i supiarečyli patrabavańniam RUP „Brestenierha“ jak zakazčyka.», — adznačajecca ŭ Śledčym kamitecie.

Žukava, Hoŭziča i Taŭpianca abvinavacili ŭ łabiravańni intaresaŭ «Ciepłaenierhaservis-EK».

Eduard Taŭpianiec nie tolki nastajaŭ na hałasavańni, ci «za», ci «suprać», ale i jašče nastojliva rekamiendavaŭ hałoŭnamu inžynieru «Brestenerha» Kapskamu ŭklučyć u śpis pretendentaŭ na tarhach «Ciepłaenierhaservis-EK».

Paviedamlajecca, što łabiravańnie intaresaŭ «Ciepłaenierhaservis-EK» praciahvałasia doŭhi čas.

Źmicier Pankaviec

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH