Milicyja kanfiskavała kampjutar u śvietłahorskaha błohiera i hramadskaha aktyvista Hienadzia Žulehi.
Kampjutar byŭ kanfiskavany padčas ahladu kvatery aktyvista, praviedzienaha 17 žniŭnia z sankcyi prakurora.
Žuleha 6 žniŭnia źniaŭ videa pra dom staršyni Śvietłahorskaha rajvykankama i raźmiaściŭ jaho na svaich staronkach u sacyjalnych sietkach. Paśla hetaha chtości raźmiaściŭ rolik na niekalkich sajtach navin, paviedamiŭ aktyvist.
Jon i raniej zdymaŭ roliki pra žyćcio ŭ rajcentry, niavyrašanyja sacyjalnyja prablemy horada, da prykładu, pra adsutnaść śviatłaforaŭ, pra zapuścieńnie ŭ miascovym parku, raźbityja darohi.
«Dom staršyni rajvykankama ja zdymaŭ, nie admaŭlaju. Na ŭsie pytańni, na ŭsie niavyrašanyja prablemy ŭ horadzie ŭłady adkazvajuć: niama hrošaj. Ja hetym rolikam pakazaŭ, što hrošy jość, tolki voś raschodujucca jany na budaŭnictva damoŭ dla načalstva, a nie na vyrašeńnie prablem hramadzian», — rastłumačyŭ błohier.
Milicyja pryjšła z pastanovaj ab praviadzieńni ahladu žylla. «Milicyjaniery mnie rastłumačyli, što žonka staršyni rajvykankama napisała na mianie zajavu, maŭlaŭ rolikam, raźmieščanym u internecie, ja źniasłaviŭ honar i hodnaść jaje siamji, a infarmacyja na videa maje paklopnicki charaktar. Ja liču, što paklopu, heta značyć zaviedama niepraŭdzivaj infarmacyi, u roliku niama», — skazaŭ Žuleha.
Z pastanovy milicyi taksama vynikaje, što žonka staršyni rajvykankama prosić pryciahnuć aktyvista da ŭstanoŭlenaj zakonam adkaznaści.
Pavodle papiarednich źviestak, kryminalnaja sprava ŭ dačynieńni da błohiera nie raspačynałasia i nie składaŭsia pratakoł ab administracyjnym pravaparušeńni. Milicyjaniery paviedamili Žulehu, što jaho kampjutar buduć praviarać, a potym budzie vyrašacca pytańnie ab pryciahnieńni jaho da adkaznaści.
