Vieličynia siaredniaha zarobku ŭ Biełarusi ŭ čarhovy raz abnaviła rekord. U lipieni jon dasiahnuŭ $617.
Ci mnoha heta ŭ jeŭrapiejskich maštabach?
«Naša Niva» sabrała apošnija źviestki ab zarobkach u 20 krainach Uschodniaj i Centralnaj Jeŭropy.
Patencyjna jany znachodziacca ŭ adnoj vahavaj katehoryi ź Biełaruśsiu. Zmahacca z krainami Zachodniaj Jeŭropy ci sa skandynavami nam pakul niekarektna. Naprykład, u Narviehii siaredni miesiačny zarobak padstupiŭ da 5000 jeŭra.
Sačycie za rukami
Ličby, jakija ahučvaje Biełstat, padajucca nasielnictvu małarealnymi. Maŭlaŭ, chto heta ŭ małych haradach zarablaje bolš za $600? Śmiech dyj hodzie.
Miesiac tamu «Naša Niva» padličyła: siaredni zarobak u 108 sa 118 rajonaŭ nasamreč nie daciahvaŭ da siaredniaha pa krainie. Adnak biełaruskaja mietodyka padlikaŭ mała adroźnivajecca ad toj, što prymianiajecca ŭ inšych krainach. Naprykład,
statystyčnaja słužba Čechii ščyra pryznajecca, što dźvie traciny nasielnictva maje mienš za siaredni zarobak.
Ale taksama čuje śmiech ad šarahovych čechaŭ: nie moža takoha być, kab vychodziła amal pa 1000 jeŭra na čałavieka.
Nieta i bruta
Adzinaja istotnaja roźnica — vieličynia padatkaŭ.
Pry ciapierašniaj biełaruskaj schiemie asnoŭnuju nahruzku niasie pracadaŭca, ad naličanaha zarobku rabotnika na karyść dziaržavy adskubajecca ŭsiaho 13%. Heta padachodny padatak i adličeńni ŭ piensijny fond. Takim čynam, nasamreč u siaredniestatystyčnaha biełarusa na rukach zastaniecca kala $540.
Takuju ž sumu ad «brudnaha» zarobku zabirajuć u Rasii, padobnuju — u Małdovie.
Adnak u bolšaści inšych krain schiema inšaja, i bolšaść padatkaŭ vyličvajecca niepasredna z zarobku. Naprykład,
u Bośnii i Hiercahavinie davodzicca viarnuć dziaržavie ažno 36% ad naličanych hrošaj. U vyniku ad niemałych $850 (zarobak-bruta ) u kišeni rabotnika realna zastajucca tolki $545 (zarobak-nieta ) — amal jak u Biełarusi.
Tracinu ad naličanaha zarobku viartajuć u Vienhryi, Čarnahoryi, Makiedonii… Samymi vysokimi «brudnymi» hrašyma ŭ postsacyjalistyčnaj Jeŭropie mohuć pachvalicca słaviency. Adnak z dekłaravanych 1500 jeŭra nasamreč jany atrymlivajuć 1000 jeŭra.
Reaktyŭnyja statystyki
Jašče adno pytańnie — apieratyŭnaść padlikaŭ. Adzinaha standartu ŭ Jeŭropie nie isnuje. Naprykład, biełarusy ŭžo daviedalisia pra svaje lipieńskija zarobki. Takija ž chutkija čarnahorcy i charvaty.
A ŭ Čechii i Słavakii tym časam padličyli dadzienyja za pieršy kvartał. Pra ałbancaŭ bieź śmiechu i nie raskažaš. Tam vyznačylisia tolki z zarobkami svaich dziaržaŭnych słužačych, i toje tolki za 2012 hod.
U adnu tablicu daviałosia zvodzić dadzienyja za rozny čas. Adnak krytyčnaj pamyłki ŭ hetym niama.
U adroźnieńnie ad Biełarusi, dzie zarobak raście pa zahadzie štomiesiac, u inšych krainach jon vyhladaje stabilnym.
U chlebny miesiac moža trochi padraści, a ŭ nastupnym, naadvarot, apuścicca.
Bahaciejšyja za biełarusaŭ
Čas pierajści da padsumavańnia. Pakolki ŭ mnohich krainach sa śpisu chodzić jeŭra, a ŭ inšych nacyjanalnaja valuta pryviazanaja da ahulnakantynientalnaj, to i my svaje padliki rabili ŭ jeŭra. Adnak dla nahladnaści pradublavali ich i ŭ dalarach, u adpaviednaści z aktualnym kursam.
Niahledziačy na vielizarnyja padatkovyja vypłaty, Słavienija zastajecca samaj bahataj postsacyjalistyčnaj krainaj Jeŭropy, apiaredžvajučy byłych susiedziaŭ pa Juhasłavii.
Pryčym niekatorych, jak harotnaja Makiedonija, ažno ŭtraja.
Uśled zładžanaj hrupaj iduć paśpiachovyja Estonija, Čechija i Charvatyja, dzie «čysty» zarobak padbirajecca da $1000 u ekvivalencie.
Polšča i Rasija iduć naha ŭ nahu, adnak kali brać «čysty» zarobak pa stalicach, to Maskva istotna apiaredžvaje Varšavu ($1500 suprać $1300).
Dla paraŭnańnia, dla minčukoŭ Biełstat naličyŭ $700. Našyja bałtyjskija susiedzi pa naličanym zarobku adarvalisia daloka ad Biełarusi, adnak roźnica ŭ padatkach častkova «źjadaje» roźnicu.
Brakuje ŭsiaho $100–120, kab dahnać susiedziaŭ. Inšaje pytańnie, što taki skačok moža ŭ čarhovy raz nachilić, kali nie pastavić na kaleni, łukašenkaŭskuju madel ekanomiki.
Biadniejšyja nacyi
Małdova, Ałbanija i Ukraina pastajanna znachodziacca siarod aŭtsajdaraŭ. Na ich uzrovień Biełaruś skatvałasia ŭ momant abvalnaj devalvacyi. Z paŭhoda tamu našy zarobki abyšli i najbiadniejšuju z krain Jeŭrasajuza — Bałharyju.
Za košt rostu zarobkaŭ za apošnija miesiacy i nizkaj padatkovaj bazy biełarusam udałosia stać bahaciejšymi za šerah bałkanskich krain — Makiedoniju, Rumyniju i Sierbiju.
Nienašmat napieradzie i Bośnija.
Adnak ci chopić u biełaruskaha Nacbanka mocy, kab kantralavać płaŭnuju devalvacyju rubla, zaležyć pieradusim ad situacyi na rynku i palityčnaj voli kiraŭnictva krainy.
