Ideja zboru podpisaŭ suprać 100-dalaravaha vyjaznoha myta pryjšła ŭ hałavu kaardynataru inicyjatyvy «Chryścijanski ruch» Alaksieju Šeinu. Nahadajem, u minułuju subotu Łukašenka prapanavaŭ uvieści taki zbor z tych, chto vyjazdžaje ź Biełarusi na zakupy ŭ susiednija krainy.
Šein raźmiaściŭ svaju pietycyju na imia Łukašenki na anłajn-placoŭcy Change.org.
Za dva dni suprać novaj inicyjatyvy padpisałasia ŭžo 5 700 čałaviek.
«Z ulikam uzroŭniu zarobkaŭ u Biełarusi, asabliva ŭ rajonnych haradach i vioskach, suma dadzienaj pošliny razam z koštam šenhienskaj vizy robiać praktyčna niedastupnym vyjezd bolšaj častki hramadzian Biełarusi za miažu», — havorycca ŭ pietycyi.
Alaksiej Šein ličyć, što takoje myta parušaje Kanstytucyju i šerah mižnarodnych kanviencyj.
«My ličym, što dadzienaja ideja ŭščamlaje prava na svabodu pieramiaščeńnia», — havorycca ŭ pietycii.
Darečy, siońnia vice-premjer Piatro Prakapovič zajaviŭ, što pytańnie pra myta «płanujecca adpracavać na praciahu bližejšaha miesiaca — paŭtara».
«Podpisy, akramia Łukašenki, buduć nakiravanyja ŭ abiedźvie pałaty nacyjanalnaha schodu i Michaiłu Miaśnikoviču, — raskazaŭ «Našaj Nivie» Alaksiej Šein. — Pietycyja źjaviłasia ŭ piatnicu, adnak u vychodnyja ludzi padpisvalisia marudna. Zatoje ad učorašniaha viečara padpisalisia amal 5 tysiačaŭ čałaviek, tamu my prahnazujem, što siońnia pieraadolejem adznaku ŭ 10 tysiačaŭ podpisaŭ».
