Padrychtavacca da atrymańnia «karty palaka» možna prykładna za tyja ž hrošy i čas, što i da atrymańnia pravoŭ na kiravańnie aŭtamabilem.
U adnu sa škoł zvaniu pad vyhladam klijenta. Skazać, što z polskimi karaniami ŭ mianie prablema i navat nie viedaju, jak vyhladaje ściah zachodniaj susiedki, nie paśpiavaju — mnie adrazu raskazvajuć padrabiaznaści pra raskład kursaŭ i ich košt.
«Kurs praciahvajecca try miesiacy, zaniatki trojčy na tydzień, pa 90 chvilin.
Vykładčyk rychtuje pa ŭsim — pa vusnaj movie, pa sumoŭi — prapracoŭvajucca adkazy na ŭsie pytańni pa karcie palaka. Kaštuje prahrama 2 miljony 400 tysiač».
Žadajučych šmat, tamu małady dziavočy hołas ź inšaha boku słuchaŭki raić mnie paśpiašacca.
Pytańnie pra adnosna vysoki košt kursaŭ (hod tamu prykładna stolki ž ja zapłaciŭ za ceły hod zaniatkaŭ anhlijskaj movaj) zastajecca biez adkazu. Zatoje mianie zapeŭnivajuć, što stanoŭčy vynik amal harantavany.
«Bolšaść atrymlivaje karty. Z taho, što my viedajem, prynamsi.
Paśla našaha kursa jość nieabchodnyja navyki. Moŭnyja ŭ tym liku — biez hetaha nie projdzieš. Dakumientaŭ my nijakich nie patrabujem — heta tolki pasolstva».
Minčanka Sofja na kursy palakaŭ nie chadziła — z karaniami ŭ jaje ŭsio jak treba, movu vyvučyła samastojna. Tamu kartu palaka atrymała biez prablem. Ale, jana raskazvaje, što na sumoŭi ŭ ambasadzie była chutčej vyklučeńniem. Bolšaść žadajučych atrymać «kartu palaka» biełarusaŭ navat nie viedajuć, chto taki Jan Pavieł II.
«Ja była ŭ šoku ad taho, što tolki čałaviek dziesiać z tryccaci byli niejak padrychtavanyja. Rešta navat nie viedała, chto taki Jan Pavieł II».
Sofja havoryć, što palakaŭ ź biełarusaŭ robiać nie ŭ adnoj tolki moŭnaj škole. Akazvajecca, taki biznes u Minsku nabiraje abaroty!
«Znajomy chłopiec polskaj movy nie viedaŭ zusim. Nul. Zapisaŭsia na kursy: try miesiacy dvojčy na tydzień. Dyk tam nasamreč metanakiravana viaduć da atrymańnia karty palaka. Paśla hetych kursaŭ jon krok uleva, krok uprava — ni słova nie moh skazać
Tym časam pa źviestkach na pačatak hoda, Polšča vydała ŭžo sto tysiač kart palaka. 42 tysiačy ź ich atrymali hramadzianie Biełarusi.
