Nivodzin rehijon Biełarusi nie dasiahnuŭ prahnazavanaha ŭzroŭniu ekanamičnaha rostu, zaznačajecca ŭ ahladzie, padrychtavanym Ministerstvam ekanomiki.Abjom vałavoha rehijanalnaha praduktu (VRP) u Minsku, a taksama ŭ Viciebskaj i Mahiloŭskaj abłaściach u studzieni-lipieni hetaha hoda skłaŭsia nižejšym za ŭzrovień adpaviednaha letašniaha pieryjadu.
«Va ŭsich rehijonach adznačajecca zapavolvańnie tempaŭ rostu VRP u paraŭnańni z vynikami pieršaha kvartała 2013 hoda, najbolšaje — u Minskaj vobłaści — 3,9 pracentnaha punkta», — havorycca ŭ ahladzie.
Pavodle acenak Minekanomiki, adsutnaść pryrostu VRP u Viciebskaj vobłaści źviazana ŭ asnoŭnym sa źmianšeńniem abjomaŭ aptovaha tavaraabarotu pradukcyi naftachimii, u Mahiloŭskaj — sa skaračeńniem vytvorčaści pradukcyi pramysłovaści i pakazčykaŭ budaŭnictva, u Minsku — z pracaj pramysłovaha siektara.
Jak paviedamlałasia raniej, u studzieni-lipieni rost VUP u Biełarusi skłaŭ 1,4% pry zapłanavanym uradam zadańni na hod na ŭzroŭni 8,5%.
Zhodna sa źviestkami Minekanomiki, klučavyja siektary ekanomiki nie demanstrujuć prahnazavanaha rostu.
Ekspart tavaraŭ u 2013 hodzie źniziŭsia na fonie skaračeńnia źniešniaha popytu na biełaruskuju pradukcyju. Pavodle źviestak Biełstata, u studzieni-lipieni tavarny ekspart Biełarusi skłaŭ 22,5 młrd. dołaraŭ, što mienš za pakazčyk anałahičnaha letašniaha pieryjadu amal na čverć (na 23,3%).
Skaračeńnie ekspartu abumoŭlena spynieńniem ekspartu rastvaralnikaŭ, źnižeńniem pastavak na źniešnija rynki pradukcyi biełaruskaha mašynabudavańnia. Aprača taho, źnižeńnie valutnaj vyručki, jakaja pastupaje ŭ krainu, sioleta abumoŭlena źnižeńniem suśvietnych cen na kalijnyja ŭhnajeńni, ekspartam jakich zajmajecca Biełaruś.
