Biełaruś — adzinaja kraina ŭ śviecie, dzie dźvie najbujniejšyja pošukavyja sistemy ŭ internecie majuć parytet u častcy doli na miascovym rynku. Pra heta zajaviŭ na pres-kanfierencyi 24 vieraśnia ŭ Minsku kiraŭnik pošukavych servisaŭ kampanii «Jandeks» Raman Čarnin.
«Biełaruski rynak asablivy — heta adzinaja kraina ŭ śviecie, dzie dźvie najbujniejšyja pošukavyja sistemy — Yandex i Google — majuć roŭnyja rynkavyja doli. Heta ŭnikalnaja situacyja, tamu što ŭ inšych krainach jość adzin jaŭny lidar pošuku ŭ internecie, a astatnija ad jaho davoli mocna adstajuć. U Biełarusi heta nie tak — dva hałoŭnyja hulcy, i pamiž imi parytet», — paviedamiŭ Čarnin.
Tak, pavodle acenak ekśpiertaŭ, Google i Yandex vałodajuć dolaj rynku ŭ pamiery 42–43%, za imi idzie Mail.ru z dolaj 11–12%.
U Biełarusi Yandex štomiesiac naviedvajuć 2,5 młn. karystalnikaŭ, jakim servisami kampanii apracoŭvajecca 180 młn. zapytaŭ.
Pavodle słoŭ Čarnina, pry raspracoŭcy svaich servisaŭ «Jandeks» zaŭsiody imkniecca dumać pra Biełaruś jak asobny nišavy rynak, uličvać intaresy miascovych karystalnikaŭ.
«Jandeks» — rasijskaja IT-kampanija, jakaja vałodaje adnajmiennaj sistemaj pošuku ŭ sietcy i internet-partałam.
Pošukavaja sistema «Jandeks» źjaŭlajecca čaćviortaj siarod pošukavych sistem śvietu pa kolkaści apracavanych pošukavych zapytaŭ (pa stanie na śniežań 2012 hoda — 4,84 młrd. zapytaŭ, 2,8% ad suśvietnaj kolkaści).
