Deputaty pałaty pradstaŭnikoŭ na pasiadžeńni 2 kastryčnika adnahałosna pryniali ŭ pieršym čytańni papraŭki ŭ niekatoryja zakony Biełarusi pa pytańniach praviadzieńnia vybaraŭ i refierendumaŭ.
Pavodle słoŭ staršyni CVK Lidzii Jarmošynaj, zakonaprajekt «nakiravany na ŭdaskanaleńnie pravavoha rehulavańnia vybarčaha pracesu, zapaŭnieńnie prabiełaŭ u zakanadaŭstvie».
Staršynia pałaty pradstaŭnikoŭ Uładzimir Andrejčanka adznačyŭ, što dakumient, jaki razhladajecca deputatami, «staŭ vynikam surjoznaj pracy pa aptymizacyi vybarčaha zakanadaŭstva».
Prajekt praduhledžvaje ŭniasieńnie ŭ vybarčaje zakanadaŭstva šerahu navin. Tak, prapanujecca praviadzieńnie vybaraŭ deputataŭ Pałaty pradstaŭnikoŭ u adzin tur, a pieramožca ŭ ich budzie vyznačacca zhodna z pryncypam adnosnaj bolšaści.
Miarkujecca źmianić paradak finansavańnia vybarčych kampanij. Tak, na prezidenckich vybarach budzie pavialičany z troch da dzieviaci tysiač bazavych vieličyń pamier asabistaha fondu kandydata. Pry hetym farmiravać jaho možna budzie nie paśla rehistracyi kandydata, a z momantu rehistracyi jaho inicyjatyŭnaj hrupy.
Buduć taksama źmienieny abmiežavańni pry ŭniasieńni ŭ fond asabistych srodkaŭ kandydata.
Pamier vybarčaha fondu kandydataŭ u deputaty Pałaty pradstaŭnikoŭ zastaniecca raniejšy — adna tysiača bazavych vieličyń, na miascovych vybarach u zaležnaści ad uzroŭniu savieta — da 10 i da 30 bazavych vieličyń. U toj ža čas praduhledžana, što kandydatu nie buduć vydzialacca biudžetnyja srodki na vyrab pieradvybarnych materyjałaŭ. Vyzvalenyja pry hetym srodki buduć nakiravany na vyrab vybarčymi kamisijami infarmacyjnych materyjałaŭ pra kandydataŭ. Infarmacyjnyja materyjały buduć nakiroŭvacca kožnamu vybarščyku razam z paviedamleńniem pra datu i čas hałasavańnia.
Zakonaprajekt prapanuje pry praviadzieńni vybarčych kampanij, kampanij pa refierendumie ŭvieści zabaronu na ažyćciaŭleńnie dziejańniaŭ, jakija schilajuć da zryvu, admieny ci pieranosu terminu vybaraŭ, refierendumu.
Dakumient abmiažoŭvaje koła asob, jakija majuć prava padavać zajavy na paŭtorny padlik hałasoŭ. Ciapier hety pieralik nie vyznačany. U prajekcie prapanujecca dać takoje prava tolki kandydatam, a taksama vybarčym kamisijam.
Prapanujecca taksama ŭstanavić miežavy 10-dzionny termin padačy zvarotaŭ pra parušeńnie vybarčaha zakanadaŭstva paśla praviadzieńnia vybaraŭ ci refierendumu.
Akramia taho, zakonaprajekt dapaŭniaje pieralik pytańniaŭ, jakija nie mohuć vynosicca na respublikanski refierendum, ukazańniem na ŭstanaŭleńnie, źmianieńnie i admienu zboraŭ (pošlin).
Nieabchodna adznačyć, što demakratyčnyja partyi i arhanizacyi vykazvali zaniepakojenaść z nahody raspracoŭki papravak u vybarčaje zakanadaŭstva, u pryvatnaści, z-za taho, što prajekt dakumienta nie byŭ vyniesieny na šyrokaje abmierkavańnie.
