Pałata pradstaŭnikoŭ nacyjanalnaha schodu 2 kastryčnika pryniała ŭ pieršym čytańni zakonaprajekt pra ŭniasieńnie dapaŭnieńniaŭ u niekatoryja zakony Biełarusi pa pytańniach prachodžańnia vajennaj słužby.
Zhodna z zakonaprajektam, asobam, jakija prachodziać voinskuju słužbu, a taksama słužbu ŭ orhanach unutranych spraŭ, finansavych rasśledavańniaŭ i padraździaleńniach MNS zabaroniena atrymlivać ad zamiežnych dziaržaŭ dakumienty, jakija dajuć ilhoty i pieravahi ŭ suviazi z palityčnymi i relihijnymi pohladami ci nacyjanalnaściu. Zabaraniajecca karystacca takimi lhotami, kali inšaje nie praduhledžana mižnarodnymi dahavorami, jakija padpisała Biełaruś.
Ministr abarony Juryj Žadobin, jaki pradstaŭlaŭ dakumient, adznačyŭ, što paśla taho jak dakumient nabudzie moc, pry pastupleńni na vajennuju słužbu nieabchodna budzie zdać ilhotnyja dakumienty zamiežnych dziaržaŭ, kali jany jość, na praciahu piaci dzion. Heta budzie abumoŭlena ŭ kantrakcie.
Varta adznačyć, što ŭ lutym 2012 hoda anałahičnyja abmiežavańni byli ŭviedzieny ŭ dačynieńni da biełaruskich čynoŭnikaŭ. Pavodle papravak u zakon «Ab dziaržaŭnaj słužbie» dziaržsłužačym zabaraniajecca karystacca lhotami i pieravahami, jakija dajucca zamiežnymi dziaržavami ŭ suviazi z palityčnymi, relihijnymi pohladami ci nacyjanalnaj prynaležnaściu, a taksama atrymlivać dakumienty, što dajuć takija lhoty i pieravahi.
Papraŭki ŭ zakon byli raspracavanyja ŭ miežach rašeńnia Kanstytucyjnaha suda Biełarusi adnosna zakona Polščy ab karcie palaka.
Karta palaka paćviardžaje prynaležnaść hramadzianina krain SND i Bałtyi da polskaha naroda. Jaje ŭładalnik maje prava na atrymańnie doŭhaterminovaj šmatrazovaj vizy na znachodžańnie ŭ Polščy, lehalnuju pracu na terytoryi Polščy biez atrymańnia dazvołu na pracu, zaniatak pradprymalnickaj dziejnaściu naroŭni z polskimi hramadzianami i inšyja lhoty.
Kanstytucyjny sud Biełarusi paličyŭ, što asobnyja normy zakona ab karcie palaka nie adpaviadajuć ahulnapryznanym pryncypam suvierennaj roŭnaści dziaržaŭ i nieŭmiašańnia ŭ spravy, jakija ŭvachodziać va ŭnutranuju kampietencyju inšaj dziaržavy, praduhledžanym statusam AAN, a taksama šerahu mižnarodnych i dvuchbakovych biełaruska-polskich dakumientaŭ.
