Sotni čałaviek pryjšli raźvitacca ź Viktaram Ivaškievičam. Fota svaboda.org.
Sotni čałaviek pryjšli raźvitacca ź Viktaram Ivaškievičam. Fota svaboda.org.
Sotni čałaviek pryjšli raźvitacca ź Viktaram Ivaškievičam. Fota svaboda.org.
Fota Jaŭhiena Jerčaka, BiełaPAN
Sotni čałaviek pryjšli 5 kastryčnika ŭ zału rytualnych pasłuh na vulicy Alšeŭskaha ŭ Minsku, kab raźvitacca z apazicyjnym palitykam Viktaram Ivaškievičam. Heta rodnyja i siabry pamierłaha, viadomyja palityki i hramadskija dziejačy, žurnalisty, paviedamlaje BiełaPAN.
Siarod tych, chto pryjšoŭ pravodzić Viktara Ivaškieviča ŭ apošni šlach, — pieršy kiraŭnik niezaležnaj Biełarusi Stanisłaŭ Šuškievič,hienierał, były deputat parłamienta Valeryj Frałoŭ, sustaršynia arhkamiteta pa stvareńni partyi «Biełaruskaja chryścijanskaja demakratyja», eks-kandydat u prezidenty Vital Rymašeŭski, apazicyjnyja dziejačy Lavon Barščeŭski, Vincuk Viačorka, Hienadź Łojka i inšyja.
Uspaminajučy pra Viktara Ivaškieviča, Vincuk Viačorka skazaŭ: «Svaim ramantyzmam i aptymizmam jon abiazzbrojvaŭ apanientaŭ i natchniaŭ siabroŭ. Viktar byŭ śvietły, pazityŭny i ŭśmiešlivy čałavieka, jaki nikoli nie hublaŭ pačućcio humaru.
Jon lubiŭ žyćcio i ludziej, hetym jon byŭ darahi blizkim, siabram i ŭsioj Biełarusi. Jon vioŭ za saboj narod i byŭ pierakanany, što treba abapiracca na ludziej. Imia Viktara Ivaškieviča zahučyć tady, kali ździejśnicca toje, u što jon vieryŭ».
Lavon Barščeŭski ŭspomniŭ słovy Viktara Ivaškieviča ab tym, što «ciapier nie čas zajmacca miemuarami — treba płanavać budučyniu». «Tamu treba dumać ab budučyni, ab tym, ab čym jon maryŭ», — skazaŭ Barščeŭski.
Staršynia Biełaruskaj asacyjacyi žurnalistaŭ Žanna Litvina nahadała ab tym, što Viktar Ivaškievič zajmaŭsia i žurnalisckaj pracaj.
«Dla mianie jon jašče i kaleha pa cechu. Heta byŭ žurnalist, jaki paciarpieŭ za słova i praŭdu. Jon źjaŭlajecca prykładam u najnoŭšaj historyi sučasnaj sumlennaj žurnalistyki», — adznačyła Litvina.
Vystupoŭcy havaryli pra pamierłaha jak pra «fantastyčnaha arhanizatara», čałavieka, jaki arhanizoŭvaŭ najbujniejšyja narodnyja vystupleńni 1980-ch hadoŭ.
Z supraćlehłaha boku vulicy za raźvitańniem nazirajuć dva čałavieki ŭ cyvilnym, tam ža pryparkavana niekalki mikraaŭtobusaŭ.
Raźvitańnie ź Viktaram Ivaškievičam budzie doŭžycca da 14 hadzin. Zatym jon budzie pachavany na Paŭnočnych mohiłkach stalicy.
Viadomy apazicyjny palityk, lidar arhkamiteta pa stvareńni partyi «Biełaruski ruch» Viktar Ivaškievič pamior u 9-j balnicy Minska 3 kastryčnika paśla ciažkaj i praciahłaj chvaroby na 55 hodzie žyćcia.
Viktar Ivaškievič — žurnalist pa adukacyi. Z pačatku 1980-ch hadoŭ aktyŭna ŭdzielničaŭ u maładziožnym nacyjanalnym ruchu, niefarmalnych abjadnańniach «Majstroŭnia» i «Tałaka».
Jaho ličyli adnym z najbolš talenavitych arhanizataraŭ roznych akcyj. U ich liku — marš-pratest pa Zachodniaj Dźvinie-Daŭhavie (razam z adnadumcami z Łatvii) suprać budaŭnictva Daŭhaŭpiłskaj HES 1987 hoda, ekałahičny marš pa Prypiaci — adna ź pieršych čarnobylskich akcyj pratestu 1988 hoda, zabastoŭka vadzicielaŭ haradskich aŭtobusaŭ u Minsku 1989 hoda.
U 1991 hodzie Ivaškievič staŭ inicyjataram stvareńnia strajkamaŭ na minskich pradpryjemstvach. Z 1988 hoda — u Biełaruskim narodnym froncie.
Da 1996 hoda Viktar Ivaškievič byŭ sakratarom upravy BNF, adkazvaŭ za arhanizacyju masavych akcyj i finansavaje zabieśpiačeńnie BNF.
Uvachodziŭ u hrupu lidaraŭ BNF, jakija adkryta vystupili z krytykaj Zianona Paźniaka na źjeździe partyi ŭ 1999.
Z 1997 hoda Viktar Ivaškievič byŭ redaktaram haziety «Rabočij», z 1999-ha — vice-prezidentam Biełaruskaha kanhresa demakratyčnych prafsajuzaŭ.
Palityk nieadnarazova atrymlivaŭ administracyjnyja pakarańni ŭ vyhladzie aryštaŭ i štrafaŭ, u znak pratestu abjaŭlaŭ haładoŭku. U kastryčniku 2002 hoda asudžany na dva hady abmiežavańnia voli za publikacyju artykuła «Złodziej pavinien siadzieć u turmie», u jakim prakuratura ŭbačyła paklop na prezidenta.
Na prezidenckich vybarach 2010 hoda Viktar Ivaškievič źjaŭlaŭsia davieranaj asobaj kandydata ŭ prezidenty ad «Jeŭrapiejskaj Biełarusi» Andreja Sańnikava.
Nieŭzabavie paśla vybaraŭ, u lutym 2011 hoda, Ivaškievič i hrupa inšych členaŭ Partyi BNF vyjšli ź jaje radoŭ u znak niazhody ź dziejańniami eks-kandydata ŭ prezidenty ad Partyi BNF Ryhora Kastusiova i abjavili ab stvareńni nacyjanalna-demakratyčnaj partyi «Biełaruski ruch».
Viktar Ivaškievič uznačaliŭ arhkamitet novaj partyi. Siarod pryjarytetaŭ «Biełaruskaha ruchu» nazyvałasia baraćba za vyzvaleńnie palitźniavolenych, praviadzieńnie svabodnych i spraviadlivych vybaraŭ biez udziełu Alaksandra Łukašenki, maksimalna žorstkija sankcyi ŭ dačynieńni da kirujučaj elity Biełarusi.