Siońnia ŭ Miensku prajšła čarhovaja presavaja kanferencyja arhanizataraŭ pratestavych akcyjaŭ, prymierkavanych na vosień.
Žurnalistaŭ sklikali najpierš dla taho, kab zajavić: heta buduć nie asobnyja ŭsploski pratestu, a skaardynavanaja palityčnaja kampanija. Demakratyčnaja apazycyja spadziajecca, što da jaje dałučacca novyja hrupy, jakija raniej nie byli aktyŭnymi ŭdzielnikami palityčnych pratestaŭ. Asabliva časta ŭ źviazku z hetym uzhadvalisia čarnobylcy dy pradprymalniki.
Značnaja častka mierapryjemstvaŭ vosieńskaj kampanii majuć padkreśleny sacyjalna‑ekanamičny charaktar. Pieršaja akcyja adbudziecca 30 vieraśnia. U hety dzień u bolš čym šaścidziesiaci haradach i miastečkach pa ŭsioj krainie projduć kala 450 pikietaŭ — prynamsi, stolki zajavak na pikietavańnie ŭžo było padadziena ŭ adpaviednyja vykankamy. Aficyjnych adkazaŭ pakul što nie atrymaŭ nichto. Zrešty, arhanizatary nia duža spadziajucca na toje, što ŭłada pojdzie im nasustrač.
Pavodle niekatorych źviestak, hetym razam vykankamam była dadzienaja ŭstanoŭka na toje, kab jany pisali admovy nie pad kapirku, a vyjaŭlali vynachodlivaść. Na dumku Anatola Labiedźki, nijaki zakon nie zabaraniaje čałavieku razdać u dvary svajho domu 299 asobnikaŭ drukavanaj pradukcyi, tamu pikiety adbuducca ŭ lubym vypadku. Dyj takaja kolkaść choć i nievialikich, ale adnačasovych pratestnych akcyjaŭ maje stacca sapraŭdnym vyprabavańniem dla milicyi dy AMONu — tolki na Mienščynie było padadziena 102 zajaŭki na pikiety.
Nastupny etap vosieńskaj kampanii — 2 kastryčnika, dzień adkryćcia čarhovaj sesii Pałaty pradstaŭnikoŭ. Pierad pačatkam pracy deputaty atrymajuć admysłovy zvarot nasielnictva, u jakim budzie dadzienaja acenka ich zakanatvorčaj dziejnaści ŭ sacyjalnaj sfery. Zbor podpisaŭ pad zvarotam užo raspačaŭsia.
Zaklučnym akordam vosieńskich sacyjalnych pratestaŭ budzie Sacyjalny marš, pryznačany na 4 listapada. Pavodle kamunista Valera Uchnalova, staršyni arhkamitetu Sacyjalnaha maršu, siońnia była padadzienaja zajaŭka na jaho praviadzieńnie. Chutčej za ŭsio, ułady buduć maksymalna ciahnuć z adkazam.
Viktar Ivaškievič, staršynia arhkamitetu pryznačanaha na 14 kastryčnika Eŭrapiejskaha maršu, padkreśliŭ, što ŭ Biełarusi niama nivodnaj palityčnaj siły, jakaja b vystupiła suprać praviadzieńnia Eŭrapiejskaha maršu: «Navat praŭradavyja maŭčać». Na presavaj kanferencyi nie było Alaksandra Milinkieviča, adnak Viktar Ivaškievič zaklikaŭ nie rabić z hetaha paśpiešlivych vysnovaŭ — Milinkievič znachodzicca ŭ pajezdkach pa rehijonach, i całkam padtrymlivaje ideju Eŭrapiejskaha šlachu. Na pytańnie, ci buduć arhanizatary maršu niejkim čynam spryjać pryjezdu aktyvistaŭ z rehijonaŭ, Viktar Ivaškievič adkazaŭ: «Kožny sam budzie šukać šlachoŭ, jak dabracca». Heta najlepšy sposab, ličyć jon.
«Eŭrapiejski marš, Sacyjalny marš i kampanija za svabodnyja vybary — heta try składniki padrychtoŭki vybarčaj kampanii», — zajaviŭ Anatol Labiedźka, majučy na ŭvazie vybary ŭ Pałatu pradstaŭnikoŭ, jakija majuć adbycca ŭ 2008 h.
Vincuk Viačorka sprahnazavaŭ naleta abvastreńnie situacyi ŭ krainie, najpierš z‑za vyśpiavajučaha ekanamičnaha kryzisu. Sakavik‑2008 budzie haračym — na jaho prypadaje 90‑aja hadavina abviaščeńnia BNR.
Što da ŭładaŭ, dyk tyja pakul što nie źbirajucca siadać za stoł pieramovaŭ z demakratyčnaj apazycyjaj adnosna praviadzieńnia Eŭrapiejskaha maršu. Prynamsi, ad Natalli Piatkievič adkazu niama dahetul.
 |
 |
 |
 |
 |
 |
 |
 |
