Śviatłafory — jašče adna navinka dla Zasłaŭja — pakul što nie pracujuć.
Na ŭvachodzie sustrakaje papiaredžańnie pra režym prodažu śpirtnoha.
Pieršy zasłaŭski supiermarkiet mieścicca ŭ pierśpiektyŭnym miescy.
Supiermarkiet pačali budavać u mai 2012.
«Biełmarkiet» — pieršy ŭ Zasłaŭi supiermarkiet. Dla horada-spadarožnika heta nieardynarnaja i doŭhačakanaja padzieja. Jon pracuje ŭžo amal miesiac, u časie adkryćcia na prylehłaj terytoryi toje-sioje nie darabili. Karespandent «NN» vypraviŭsia ŭ novuju kramu, kab pabačć, što robicca ŭ pieršym zasłaŭskim supiermarkiecie.
Novaja krama mieścicca na ŭskrainie horada, na miažy druhoha mikrarajona. Jaje pačali budavać u mai 2012.
Pierad zdačaj supiermarkieta ŭ ekspłuatacyju pobač rearhanizavali darožny ruch: nanieśli novuju raźmietku, abaznačyli piešachodnyja pierachody i — jašče adna navinka dla Zasłaŭja — pastavili pieršyja ŭ horadzie śviatłafory.
Što pieršaje kidajecca ŭ vočy. Śviatłafory dahetul nie pracujuć, jak i ŭ dzień adkryćcia. Zastajecca niedaroblenym učastak chodnikaŭ, što viaduć pakupnikoŭ u novuju kramu z vulicy Savieckaj.
Asartymient tavaraŭ tradycyjny dla takoha typu kramaŭ: charčovyja tavary, pradmiety hihijeny i tavary pobytavaj chimii. Pracuje adździeł, dzie možna zamović picu, sušy, a taksama haračyja napoi — kavu i harbatu.
U supiermarkiecie pracuje apteka, kramy abutku i kvietak. Sałon mabilnaha apieratara MTS pakul jašče na stadyi afarmleńnia interjeru. Zrešty, i sama suviaź ad MTS u zasłaŭskim «Biełmarkiecie» nie na vyšyni. Prynamsi, u karespandenta «NN» jana adsutničała ciaham apošnich troch vizitaŭ u kramu.
Byli zaŭvažanyja i prablemy z pracaj bankaŭskich kartak apłaty. Kasiry śćviardžali, što heta časovaja prablema i prasili raźličvaca hatoŭkaj.
U cełym ža, źjaŭleńnie pieršaha supiermarkieta — padzieja dla Zasłaŭja pazityŭnaja. Nielha skazać, što dahetul tut byli surjoznyja prablemy z pachodami ŭ kramy. Adnak časta, kab nabyć standartny nabor tavaraŭ, davodziłasia abyści nie adnu i nie dźvie kramy, zazirnuŭšy dla nadziejnaści na miascovy rynak.
Novuju kramu ŭžo ablubavali mienčuki, jakija jeduć praz Zasłaŭje na leciščy. U miascovaj kulinaryi možna nabyć zhatavanyja stravy, sałaty.
