Jak paviedamiŭ BiełaPAN aficyjny pradstaŭnik upraŭleńnia Śledčaha kamiteta pa Bresckaj vobłaści Rusłan Makaruk, Pružanski rajonny adździeł SK pravodzić pravierku pa fakcie śmierci 39-hadovaj Kaciaryny Anochavaj. 27 kastryčnika žančyna skončyła žyćcio samahubstvam u siabie doma. Pavodle adnoj ź viersij, žančyna paviesiłasia.
Kaciaryna Anochava razam z mužam Alaksandram vychoŭvała 11 dziaciej: dvaich bijałahičnych i 9 pryjomnych abo usynoŭlenych. 1 vieraśnia Kaciarynie spoŭniłasia 39 hadoŭ.
Apošni dopis Kaciaryny ŭ błohu
U lutym Tut.by apublikavaŭ materyjał pra siamju Anochavych. Žyćciaradasnaja i metanakiravanaja, Kaciaryna nie chavała svajoj ščyraj lubovi da dziaciej, jakich ličyła krynicaj radaści. «Praź niejki čas paśla źjaŭleńnia pryjomnaj dački, treciaj pa liku, my ŭśviadomili, što budziem brać da siabie ŭ siamju pryjomnych dziaciej. Z hetaha momantu jany na nas pasypalisia, jak haroch. Mabyć, mienavita ŭ hetym naša pryznačeńnie, bo nas uvieś čas pieraśledvała pačućcio, što my znachodzim svaich zhublenych dziaciej».
U intervju Kaciaryna raspaviała i pra ciažkaści, ź jakimi ich siamji davodziłasia sutykacca:
«Z pryčyny taho, što ŭ Pružanach da nas była adna niepryjemnaja historyja ź dziciačym domam siamiejnaha typu, nam spačatku davodziłasia sutykacca z peŭnymi składanaściami. Kali my zabrali pieršuju pryjomnuju dačku, da nas stavilisia naściarožana, i adčuvałasia, što ŭ našych dziejańniach niekatoryja bačać karyślivyja matyvy. Sprava ŭ tym, što papiaredniaj siamji pabudavali dom, i jany žyli, možna skazać, na poŭnym dziaržaŭnym zabieśpiačeńni. Ciapier niekatoryja ludzi pieranosiać staroje ŭsprymańnie na nas i miarkujuć, što i nam dom pabudavali za dziaržaŭny košt, a dzieci dla nas — heta ŭsiaho tolki krynica dachodu. Nasamreč heta nie tak. Viadoma, na pryjomnych dziaciej vypłačvajucca peŭnyja hrašovyja srodki, ale heta nievialikija hrošy. Hetych srodkaŭ niedastatkova dla taho, kab dziaciej vylečyć, vyvučyć i zabiaśpiečyć hodny ŭzrovień žyćcia».
***
Telefony słužby ekstranaj psichałahičnaj dapamohi
Kruhłasutkavaja słužba ekstranaj psichałahičnaj dapamohi «Telefon davieru»: 8 (017) 202-04-01
Respublikanskaja telefonnaja «haračaja linija» pa akazańni psichałahičnaj dapamohi niepaŭnahadovym, što trapili ŭ kryzisnuju situacyju: 8-801-100-16-11
Śpis kantaktaŭ ekstranych słužbaŭ u rehijonach.
