Pres-sakratar KDB Artur Strech zajaŭlaje, što biełaruskija śpiecsłužby nie majuć dačynieńnia da incydentu z zatrymańniem byłoha mieniedžara BKK Dźmitryja Samojłava ŭ Maskvie.
Artur Strech: «Nia treba być prafesijanałam, kab pabačyć absurdnaść infarmacyi, jakaja raspaŭsiudžvajecca asobnymi internet-resursami. Hetaja infarmacyja da taho ž nosić jaŭna pravakacyjny charaktar.
Viadoma, što na dadzieny momant Śledčy kamitet RF rychtuje dakumenty dla ekstradycyi na terytoryju RF Uładzisłava Baŭmhiertnera, dzie ź im i ź inšymi fihurantami tak zvanaj «kalijnaj spravy« buduć pravodzicca nieabchodnyja mierapryjemstvy rasiejskimi pravaachoŭnymi orhanami, u jakich dastatkova mahčymaściaŭ dla praviadzieńnia aperatyŭna-śledčych dziejańniaŭ i zabieśpiačeńnia abjektyŭnaha raśśledavańnia hetaj spravy.
Aproč taho, nie vyklikaje nijakich sumnieńniaŭ uzrovień kampetentnaści i prafesijanalizmu supracoŭnikaŭ FSB, jaki dazvalaje vyklučyć mahčymaść pracy supracoŭnikaŭ zamiežnych specsłužbaŭ na terytoryi Rasiejskaj Federacyi.
A adznaku dziejańniam supracoŭnikaŭ słužby biaśpieki «Ŭrałkalija» i ichniamu psychalahičnamu stanu pavinna davać kiraŭnictva kampanii, a nie KDB».
Artur Strech paćvierdziŭ Radyjo Svaboda, što ŭ adpaviednaści z zakanadaŭstvam dziejańni supracoŭnikaŭ KDB na terytoryi RF niemahčymyja.
«Heta vyklučana, — kaža Artur Strech. — Vy možacie sabie ŭjavić, jak dva siaržanty palicyi z bojem adbivajuć u supracoŭnikaŭ KDB menedžera «Ŭrałkalija»? Heta prosta absurd».
Artur Strech zajaŭlaje, što KDB nia maje źviestak pra toje, kali adbudziecca ekstradycyja Ŭładzisłava Baŭmhiertnera ŭ Rasieju: «Pa hetyja źviestki treba źviartacca ŭ Śledčy kamitet».
Na pytańnie, ci maje dačynieńnie KDB RB da raśśledavańnia spravy Ŭładzisłava Baŭmhiertnera i inšych menedžeraŭ BKK, Artur Strech adkazvaje: «Nie».
Paśla incydentu na Leninhradzkim vakzale ŭ Maskvie, dzie ŭ minułuju piatnicu supracoŭniki specsłužbaŭ Biełarusi pasprabavali zatrymać hramadzianina Rasiei, adnaho z top-menedžeraŭ ZAT «Biełaruskaja kalijnaja kampanija » (BKK ) Dźmitryja Samojłava, słužba biaśpieki «Ŭrałkalija» ŭziała pad achovu ŭsich supracoŭnikaŭ kampanii, da jakich prajaŭlajuć aperatyŭnuju cikavaść biełaruskija siłaviki.
Jak paviedamiła rasiejskaja hazeta «Iźviestija», u kampanii rasceńvajuć ryzyku ich zatrymańnia jak vysokuju. Pavodle słužby biaśpieki «Ŭrałkalija», supracoŭniki KDB Biełarusi ŭstalavali ŭ Maskvie kruhłasutačnyja pasty i sočać adrazu za niekalkimi menedžerami «Ŭrałkalija».
U kampanii paćvierdzili, što ŭ minułuju piatnicu supracoŭniki KDB Biełarusi pasprabavali zatrymać na Leninhradzkim vakzale top-menedžera BKK Dźmitryja Samojłava, jaki jechaŭ u Sankt-Pieciarburh.
Niekalki aperatyŭnikaŭ u cyvilnym źniali jaho prosta ź ciahnika i pasprabavali vyvieści z vakzału, adnak biznesmen padniaŭ šum, jaki pryciahnuŭ uvahu miascovaj palicyi. Paśla niadoŭhich razboraŭ u adździaleńni supracoŭniki KDB musili sastupić.
