U abodvuch abvinavačanych pa spravie ab zabojstvie minčanki Taćciany Słonimskaj pryznana najaŭnaść śviadomaści, jany zdolnyja razumieć svaje dziejańni i kiravać imi. Takija vysnovy śpiecyjalistaŭ Dziaržaŭnaha kamiteta sudovych ekśpiertyz, paviedamili BiełaPAN u Śledčym kamitecie.
Nahadajem, Taćciana Słonimskaja, jakaja pajechała ŭ viosku Mały Traścianiec (Minski rajon) da maci, a zatym nakiravałasia na svajoj mašynie «Mazda-3» u les za jahadami, źnikła 3 lipienia.
17 lipienia byli zatrymanyja dva padazronyja ŭ zabojstvie žančyny, cieła jakoj znajšli na nastupny dzień u Minskim rajonie kala vioski Dvarec.
Hałoŭnym padazravanym pa spravie źjaŭlajecca nieadnarazova sudzimy 21-hadovy minčanin. Nibyta mienavita jon nanios žančynie niekalki nažavych ranieńniaŭ, ad jakich jana pamierła, zatym pahruziŭ cieła ŭ bahažnik jaje ž mašyny i advioz u inšuju miascovaść, dzie zakapaŭ.
Druhi padazravany, minčanin 1994 hoda naradžeńnia, jamu sadziejničaŭ. Aŭtamabil Słonimskaj byŭ pradadzieny ŭ Rasii.
Zbor dokazaŭ pa spravie praciahvajecca. Abvinavačańni fihurantam spravy vystaŭleny ŭ zabojstvie pry abciažarvalnych akaličnaściach, a taksama va ŭčynieńni razbojnaha napadu (č. 2 art. 139 i č. 3 art. 207 KK).
Da ich prymieniena miera strymańnia ŭ vyhladzie źmiaščeńnia pad vartu. Sumiesna z supracoŭnikami Ministerstva ŭnutranych spraŭ ažyćciaŭlajecca kompleks mier, skiravanych na ŭstanaŭleńnie dačynieńnia abvinavačanych da inšych złačynstvaŭ.
