Kandydat ad kirujučaj kaalicyi «Hruzinskaja mara» Hieorhi Marhviełašvili zachoŭvaje liderstva na vybarach prezydenta Hruzii, jakija adbylisia 27 kastryčnika.
Hieorhi Marhviełašvili, RFE/RL
Pavodle CVK krainy, paśla apracoŭki bolš jak 90 adsotkaŭ padadzienych na vybarach biuleteniaŭ, Marhviełašvili nabiraje bolš za 62 adsotki hałasoŭ vybarščykaŭ, paviedamlaje radyjo «Svaboda».
Za jaho bližejšaha supiernika, kandydata ad apazycyjnaha «Adzinaha nacyjanalnaha ruchu» Davida Bakradze prahałasavali kala 22 adsotkaŭ, a lidera partyi «Demakratyčny ruch – adzinaja Hruzija» Nino Burdžanadze padtrymali krychu bolš za dziesiać adsotkaŭ vybarščykaŭ.
Dla pieramohi ŭ pieršym tury kandydatu ŭ prezydenty treba nabrać 50 adsotkaŭ plus adzin hołas. David Bakradze užo pavinšavaŭ Marhviełašvili i zajaviŭ, što, jak lider apazycyi, hatovy supracoŭničać z novym prezydentam i ŭradam krainy.
Miž tym, Nino Burdžanadze vykazała niezadavolenaść pracesam hałasavańnia. U jaje štabie abvinavacili pradstaŭnikoŭ Marhviełašvili i Bakradze ŭ sprobie sfalsyfikavać vybary.
CVK Hruzii, u svaju čarhu, zajaŭlaje, što na prezydenckich vybarach nie było surjoznych parušeńniaŭ, jany adbylisia ŭ kankurentnych umovach, vybarščyki svabodna vykazali svaju volu. Jaŭka skłała amal 47 adsotkaŭ.
Arhanizacyja biaśpieki i supracoŭnictva ŭ Eŭropie (ABSE) zajaviła, što vybary byli «stanoŭčymi i prazrystymi».
Žaao Saareš, kiraŭnik misii naziralnikaŭ ABSIE, zajaviŭ, što «sumlennyja vybary» pakazvajuć, što «demakratyja ŭ Hruzii stanovicca bolš stałaj».
Hieorhi Marhviełašvili vystupaje za praciahu kursu na zbližeńnie z ZŠA i EZ, źjaŭlajecca praciŭnikam niezaležnaści Paŭdniovaj Asetyi i Abchazii, ale adnačasova prychilnikam narmalizacyi adnosin z Rasiejaj.
