Jeŭrasajuz nie adstupić ad svajho patrabavańnia ab vyzvaleńni palitviaźniaŭ u Biełarusi. Ab hetym zajaviŭ ministr zamiežnych spraŭ Litvy Linas Linkiavičus.
«Heta pryncypovaje pytańnie, — skazaŭ Linkiavičus. — Ale heta nie značyć, što my nie pavinny mieć kantakty. My pavinny padtrymlivać dyjałoh, razmaŭlać pavažliva adzin z adnym jak partniory, tady my zmožam iści napierad».
Adkazvajučy na pytańnie, ci moža być adklikana zaprašeńnie Biełarusi na listapadaŭski samit Uschodniaha partniorstva, kali da času jaho praviadzieńnia palitviaźni nie buduć vyzvalenyja, Linkiavičus skazaŭ: «Davajcie nie budziem hadać. Nie budziem pakul stavić nijakich umoŭ pa samicie».
Pry hetym jon vykazaŭ nadzieju, što da Vilenskaha samita biełaruskija palitviaźni buduć vyzvalenyja.
«Jany ŭžo pavinny byli być vyzvaleny. Ich najaŭnaść u krainie niełahičnaja, niapravilnaja i kontrpraduktyŭnaja», — padkreśliŭ Linkiavičus.
Kiraŭnik MZS Litvy taksama adznačyŭ, što ciapier ES pa sankcyjach adnosna Biełarusi znachodzicca «ŭ pracesie, vyrašajecca ŭ rabočym paradku». Da 31 kastryčnika Rada ES pavinna vyznačycca, ci praciahvać jašče na hod abmiežavalnyja miery ŭ dačynieńni da biełaruskich čynoŭnikaŭ i pradpryjemstvaŭ.
Pry hetym Linkiavičus nie staŭ adkazvać na ŭdakładnialnaje pytańnie, ci varta čakać pašyreńnia abo skaračeńnia śpisu sankcyj.
Ministr taksama padkreśliŭ, što Litva jak susiedka Biełarusi zacikaŭlena ŭ spraščeńni vizavaha režymu pamiž Biełaruśsiu i ES. «Choć ciapier na vizach my zarablajem hrošy, ale my nie hanarymsia hetym. My chacieli b spraščeńnia vizavych pracedur, kab ludzi čaściej mahli naviedvać našy krainy», — adznačyŭ jon.
Akramia taho, jon zaklikaŭ «nie rabić vialikuju prablemu» z taho, što ministr zamiežnych spraŭ Biełarusi Uładzimir Makiej nie pryniaŭ zaprašeńnie na mižnarodnuju kanfierencyju «Stratehii budučaj palityki ES adnosna Biełarusi», što prachodzić 28—29 kastryčnika ŭ Vilni.
«Ale my nie hordyja, zaprosim jašče na niejkaje mieraryjemstva, — skazaŭ Linkiavičus. — My ź ministram Makiejem niadaŭna sustrakalisia ŭ Ńju-Jorku, u nas byŭ davoli kanstruktyŭny dyjałoh»
