Forum na temu «Techničny rehłamient Mytnaha sajuza (siertyfikacyja) — biełaruskaje pytańnie» prachodzić siońnia ŭ haścinicy «Jubilejnaja». Sustreča pryśviečana prablemam uviadzieńnia techrehłamientu MS pa biaśpiecy pradukcyi lohkaj pramysłovaści.Arhanizataram mierapryjemstva vystupiła RHA «Pierśpiektyva».
Na forum pryjechali pradprymalniki ź Minska, Viciebska, Hrodna, Homiela, Bresta, Rahačova, Pinska, Słonima, Maładziečna, Oršy, Miadzieła, Salihorska i Smalavičaŭ. Zaprošanyja pradstaŭniki Dziaržkamiteta pa standartyzacyi, Minhandlu i Minekanomiki mierapryjemstva praihnaravali.
Adkryvajučy forum, staršynia savieta RHA «Pierśpiektyva» Anatol Šumčanka nahadaŭ, što 31 kastryčnika vice-premjer Piotr Prakapovič, kiraŭnik Savieta pa raźvićci pradprymalnictva, paviedamiŭ ab uvachodžańni ŭ siłu patrabavańniaŭ techrehłamientu ab biaśpiecy tavaraŭ lehprama ŭžo z 1 śniežnia 2013 hoda. I heta niahledziačy na toje, adznačyŭ Šumčanka, što raniej z profilnymi dziaržorhanami była dasiahnuta damoŭlenaść: pradprymalniki zmohuć pracavać pa starych praviłach da 1 lipienia 2014 hoda.
«Hetaja vierałomnaja zajava była zroblena vielmi nie svoječasova, — padkreśliŭ Šumčanka. — Za ŭvieś čas prezidenctva spadara Łukašenki takoha nie było. Tak, pamiž nami byli nieparazumieńni, ale kali my sadzilisia za stoł pieramoŭ, to paśla vykonvalisia ŭsie damoŭlenaści».
Pavodle źviestak lidara «Pierśpiektyvy», Ministerstva ekanomiki raniej prapanoŭvała ŭrada ŭvieści takuju sistemu, pry jakoj pradprymalnik moh by sam paćviardžać pachodžańnie svaich tavaraŭ biez praviadzieńnia siertyfikacyi, adnak hetuju prapanovu nie padtrymali inšyja dziaržviedamstvy.
«Pavodle našaj infarmacyi, nie ŭsie orhany ŭłady raździalajuć pazicyju Prakapoviča, — skazaŭ Šumčanka. — A značyć, u nas jość šans urehulavać hetu situacyju, jakaja ŭ inšym vypadku pryviadzie da kałapsu ŭsioj pradprymalnickaj supolnaści ŭ Biełarusi».
Techrehłamient MS ab pradukcyi lehprama nabyŭ moc 1 lipienia 2012 hoda. Dla paetapnaha pierachodu da adzinych patrabavańniaŭ da 1 studzienia 2013 hoda dapuskałasia vytvorčaść i vypusk u abaračeńnie na terytoryi MS pradukcyi, jakaja nie padlahała da ŭvachodžańnia ŭ siłu techrehłamientu abaviazkovaj acenki (paćviardžeńnia) adpaviednaści. U Biełarusi dla IP — płacielščykaŭ adzinaha padatku hety pieryjad byŭ praciahnuty da 1 lipienia 2013 hoda.
Jašče adzin pierachodny pieryjad tyčycca pradukcyi, na jakuju da ŭviadzieńnia techrehłamientu byli vydadzienyja abo zarehistravanyja dakumienty ab paćviardžeńni adpaviednaści abaviazkovym patrabavańniam, raniej ustanoŭlenym narmatyŭnymi pravami aktami MS abo zakanadaŭstvam dziaržavy — člena MS. Vytvorčaść i vypusk u abaračeńnie takoj pradukcyi dapuskajecca da 1 lipienia 2014 hoda.
Uviadzieńnie patrabavańniaŭ techrehłamientu MS vyklikała pratesty indyvidualnych pradprymalnikaŭ (IP). Abaviazvajučy ažyćciaŭlać darahuju praceduru siertyfikacyi tavaraŭ, ličać jany, ułady staviać ich na miažu vyžyvańnia. U kancy červienia — pačatku lipienia na rynkach i ŭ handlovych centrach Biełarusi prajšli zabastoŭki.
U vyniku try ministerstvy — handlu, achovy zdaroŭja, sielskaj haspadarki i charčavańnia — i Dziaržkamitet pa standartyzacyi pryniali sumiesnuju pastanovu ab aptymizacyi pierachodu da patrabavańniaŭ techrehłamientu. Dakumient spraściŭ dla IP praceduru siertyfikacyi ŭ adpaviednaści z patrabavańniami techrehłamientu pry ŭmovie davańnia imi supravadžalnych dakumientaŭ na tavary.
Da 1 listapada 2013 hoda Minhandlu i Dziaržkamitet pa standartyzacyi damovilisia nie praviarać realizujemyja IP tavary lehprama na adpaviednaść patrabavańniam techrehłamientu. Paśla hetaj daty pradprymalniki pavinny pradjaŭlać supravadžalnyja dakumienty z paćviardžeńniem kupli tavaru na terytoryi krain MS.
