Kala pomnika Leninu na płoščy Niezaležnaści ŭ Minsku siońnia prajšła akcyja da Dnia Kastryčnickaj revalucyi, arhanizavanaja Kamunistyčnaj partyjaj Biełarusi (KPB).
U mierapryjemstvie pryniali ŭdzieł kala tysiačy čałaviek: lidary KPB, pasły Kuby i Vjetnama, pradstaŭniki Fiederacyi prafsajuzaŭ Biełarusi, Minharvykankama, BRSM, pijanierskich arhanizacyj, staličnaha kadeckaha vučylišča, studenty i školniki. Na akcyi taksama prysutničali studenty Biełaruskaha dziaržaŭnaha ekanamičnaha univiersiteta, jakija raspaviali BiełaPAN, što pradstaŭlajuć taksama BRSM i pryjšli na akcyju «pa žadańni».
Udzielniki akcyi ŭskłali da pomnika Leninu vianki i kvietki pad akampaniemient vajennaha arkiestra.
Jak adznačyŭ lidar KPB i namieśnik staršyni Minharvykankama Ihar Karpienka, 7 listapada — važnaje dla krainy śviata, bo mienavita ŭ hady savieckaj ułady «stvaralisia fabryki, zavody, pradpryjemstvy, aktyŭna raźvivałasia adukacyjnaja palityka».
«My jak historyki viedajem pieryjad biełarusizacyi, kali aktyŭna padtrymlivałasia nacyjanalnaja biełaruskaja škoła, mova, kultura, byŭ nievierahodny ŭsplosk kulturnaha raźvićcia. Takija majstry mastactva, jak Jakub Kołas i Janka Kupała, padtrymlivali savieckuju ŭładu», - adznačyŭ jon.
Prajšła siońnia taksama akcyja apazicyjnaj partyi «Spraviadlivy śviet». Jana sabrała na Płoščy Niezaležnaści 50 čałaviek.
