Pra heta zajaviŭ ministr zamiežnych spravaŭ Finlandyi Erki Tuamioja. Jon ličyć, što turnir, praviadzieńnie jakoha płanujuć u Minsku ŭ 2014 hodzie, usio jašče možna pieranieści ŭ inšuju dziaržavu.
«Urady, jakija parušajuć pravy čałavieka, nie pavinnyja mieć mahčymaść umacoŭvać svaju reputacyju za košt takich važnych spartyŭnych mierapryjemstvaŭ», — zajaviŭ Erki Tuamioja.
Praz parušeńni ŭładami Biełarusi pravoŭ čałavieka i najaŭnaść palitviaźniaŭ pravaabaroncy i mižnarodnyja instytucyi vystupili suprać arhanizacyi spartyŭnaha mierapryjemstva. Ideju pieranosu turniru padtrymali mnohija jeŭrapiejskija i amierykanskija palityki. Niekatoryja krainy ŭžo pryhrazili bajkatavać čempijanat u vypadku jaho praviadzieńnia ŭ Minsku.
Niadaŭna stała viadoma, što biełaruskija ŭłady źbirajucca pryciahnuć Interpoł dla baraćby z «chulihanami» padčas spartyŭnych mierapryjemstvaŭ. Damoŭlenaść pra heta była dasiahnutaja padčas sustrečy ministra zamiežnych spravaŭ Biełarusi Ihara Šunieviča i kiraŭnictva mižnarodnaj palicejskaj arhanizacyi.
Raniej Łukašenka vydaŭ ukaz pra toje, što pisać pra Čempijanat śvietu, praviadzieńnie jakoha zapłanavanaje ŭ Biełarusi, zmohuć nie ŭsie. «Žurnalisty, jakija nie aśviatlali chakiej abo sport, akredytoŭvacca nie buduć», — rastłumačyŭ jaho sutnaść menedžar dyrekcyi pa praviadzieńni čempijanatu Piotr Rabuchin.
