KDB datyčnaje da vybuchaŭ u Viciebsku?

Supracoŭnika UKDB pa Viciebskaj vobłaści majora Andreja Dz. padazrajuć u datyčnaści da vybuchaŭ, jakija adbylisia ŭ Viciebsku ŭ 2005 hodzie. Takuju infarmacyju atrymała internet-vydańnie «Narodnyja naviny Viciebsku», u jakoje źviarnułasia maci majora, Nina Dz.

Bolš za dva miesiacy Andrej Dz. znachodzicca pad śledztvam i ŭtrymlivajecca ŭ SIZA ŭ Miensku.

Kali dva hady tamu na viciebskich vulicach prahrymieli dva vybuchi, kiraŭnik dziaržavy prynarodna abviaściŭ: “Datyčnych da teraktu achłamonaŭ zatrymali».

Sapraŭdy, dvum hramadzianam ź Viciebsku było pradjaŭlenaje abvinavačvańnie ŭ ciažkim złačynstvie. Paŭhodu ich trymali ź śviedčym izalatary, damahajučysia ad ich pryznańnia. Ale, jak paźniej vyśvietliłasia, aryštavanyja nijakich adnosinaŭ da taho, što adbyłosia, nia mieli.

Paśla pa abvinavačvańni ŭ datyčnaści da teraktaŭ u turmu na peŭny čas kinuli znanaha lidera apazycyi Paŭła Krasoŭskaha, ale musili nieŭzabavaje vypuścić paśla pratestaŭ hramadzkaści i pravaabaroncaŭ z usiaho śvietu.

Zatoje ŭ ŚMI niadaŭna źviarnułasia viciablanka Nina Dz.

Sajt «Narodnyja naviny Viciebsku» pryvodzić tolki karotki źmiest jaje lista:

«Źviartajecca da Vas maci majora UKDB pa Viciebskaj vobłaści Dz. A. M. U Hieneralnaj prakuratury respubliki ŭ adnosinach da majho syna ŭzbudžanaja kryminalnaj sprava pa art. 295 č.3 Kryminalnaha kodeksu Respubliki Biełarusi… Pierad praviadzieńniem pieratrusu była pradjaŭlena pastanova, u jakoj havaryłasia ab vybuchach, što adbylisia ŭ 2005 h.; pry asabistaj sustrečy sa mnoj śledčy Hieneralnaj prakuratury Rasolka A.F., skazaŭ, što moj syn Dz. A. M. maje adnosiny da vybuchaŭ na płoščy Svabody ŭ h.Viciebsku ŭ 2005 h.… Hetyja abvinavačvańni nieabhruntavanyja. Moj syn — udzielnik hrupy pa raśśledavańni padziejaŭ 2005 h. U jahonym pasłužnym śpisie tolki padziaki i ŭchvaleńni, jak na ŭzroŭni ŭpraŭleńnia, dzie jon słužyć, tak i ad samoha staršyni KDB Respubliki Biełarusi».

Supracoŭniki KDB karystajucca pasłuhami svaich ahientaŭ. Voś major Dz. mieŭ “vušy” ź liku cyvilnych asobaŭ. Niechta H. raniej asudžany za ciažkoje złačynstva pa art. 295 Kryminalnaha kodeksu. Nia tak daŭno ŭ jahonym haražy vyjavili vybuchovyja rečyvy. H. na pytańnie, dzie ŭziaŭ, zajaviŭ: «Atrymaŭ ad svajho kuratara z KDB».

Majora Dz. ŭziali pad vartu ŭ mienskaje SIZA. Praviali pieratrusy va ŭsich jahonych svajakoŭ, ale anijakich dokazaŭ znojdziena nie było. Dva miesiacy major znachodzicca ŭ źniavoleńni. Cikava, što heta zdaryłasia litaralna praź niekalki dzion paśla vystupu kiraŭnika dziaržavy ab naviadzieńni paradku ŭ KDB.

Svajakam, u tym liku maci, nie dazvalajuć spatkańniaŭ. Nina Dz. vielmi zaniepakojena stanam jahonaha zdaroŭja, tamu što ŭ syna jazva straŭnika, jon raniej byŭ praaperavany, uvieś čas prymaje leki. Śledztva ŭ svaich intaresach pazbaviła Dz. sustrečaŭ sa svajakami, zabaranili navat listavańnie.

Žonka padazravanaha, Natalla Dz. (supracoŭnica jurydyčnaha adździełu Viciebskaha harvykankamu, što pakazalna), havoryć, što ŭžo nie šukaje spraviadlivaści ŭ dziaržaŭnych strukturach i spadziajecca tolki na dapamohu žurnalistaŭ.

Darečy, pavodle słovaŭ maci aryštavanaha, viciebskija aficery KDB na schodzie paručylisia za kalehu ŭ tym, što jon nie schavajecca ad śledztva, i razboru spravy pieraškadžać nia budzie. Ale śledčy z respublikanskaj prakuratury byŭ strohi ŭ svaim rašeńni. Bolš za toje, zajaviŭ Ninie Dz., što jaje syn maje adnosiny da teraktaŭ u Viciebsku dvuchhadovaj daŭniny.

Asablivuju notku ŭnosić toj fakt, što major Dz. byccam by ŭvachodziŭ ŭ skład hrupy pa raśśledavańni vybuchaŭ, jakija adbylisia ŭ Viciebsku ŭ 2005 hodzie.

Nina Dz. źviartałasia sa skarhami ŭ roznyja ŭładnyja struktury. Adkazu na svaje zvaroty jana tak i nie atrymała. Žonka majora dvojčy zapisałasia na asabisty pryjom da Hieneralnaha prakurora, ale čynoŭnik jaje nie pryniaŭ.

Termin utrymańnia Dz. pad vartaj praciahnuli jašče na 2 miesiacy. Raniej padazravanyja pa hetaj spravie ludzi tamilisia ŭ izalatary paŭhodu.