Da zakančeńnia dziejnaj kredytnaj prahramy ź Biełaruśsiu pačynać novuju nie maje sensu, zajaviŭ 12 listapada na pres-kanfierencyi ŭ Maskvie Ihar Finahienaŭ, staršynia praŭleńnia Jeŭrazijskaha banka raźvićcia, jaki kiruje srodkami Antykryzisnaha fondu JeŭrAzES.
«Pakul nie skončana dziejnaja prahrama, nastupnuju pačynać, naturalna, biessensoŭna», — skazaŭ Finahienaŭ, adkazvajučy na pytańnie BiełaPAN. Jon padkreśliŭ, što spačatku treba padvieści vyniki ciapierašniaj kredytnaj prahramy ź Biełaruśsiu.
«Nieabchodna spačatku acanić ciapierašniuju prahramu ŭ častcy efiektyŭnaści, praanalizavać padychody z punktu hledžańnia taho, nakolki jany byli prymalnyja dla vyrašeńnia zadač u suviazi z ekanamičnaj situacyjaj u Biełarusi. Tolki paśla hetaha možna budzie zrabić vysnovu, ci patrebna novaja prahrama», — padkreśliŭ Finahienaŭ.
U žniŭni Ministerstva finansaŭ Biełarusi vykazała zacikaŭlenaść u zaklučeńni novaj kredytnaj prahramy z Antykryzisnym fondam JeŭrAzES.
Pačatak ciapierašniaj kredytnaj prahramy byŭ pakładzieny dva hady tamu. 4 červienia 2011 hoda Saviet AKF uchvaliŭ vydzialeńnie Biełarusi finansavaha kredytu ŭ abjomie 3 młrd. dołaraŭ ZŠA. Kredyt vydzialajecca šaściu tranšami na praciahu 2011—2013 hadoŭ u adpaviednaści z vykanańniem etapaŭ kredytnaj prahramy biełaruskim uradam.
Piaty tranš kredytu Antykryzisnaha fondu JeŭrAzES Biełaruś atrymała 30 krasavika hetaha hoda. U acency fondu ab vykanańni ŭmoŭ piataha tranšu paviedamlałasia, što kraina nie vykanała niekalki indykatyŭnych pakazčykaŭ: u pryvatnaści, pa vieličyni pastupleńniaŭ ad pryvatyzacyi, uzroŭni kampiensavańnia nasielnictvam koštu pasłuh ŽKH i hramadskaha transpartu. Akramia taho, rost patrabavańniaŭ bankaŭ da inšych siektaraŭ ekanomiki pa vynikach 2012 hoda ŭdvaja pieravysiŭ zapłanavany ŭzrovień.
Raniej biełaruskija ŭłady vykazvali nadzieju, što apošni, šosty, tranš kredytu Antykryzisnaha fondu JeŭrAzES budzie atrymany ŭ listapadzie.
