«Polšča pryrečanaja da supracoŭnictva ź Biełaruśsiu. U nas supolnaja miaža, i my budziem rabić usio mahčymaje dla ŭciahnieńnia Biełarusi ŭ dyjałoh».
Pra heta paviedamiŭ pasoł Polščy ŭ Biełarusi Lešak Šarepka na pres-kanfierencyi ŭ Minsku.
«Na žal, adnosiny pamiž našymi krainami zaležać ad adnosinaŭ pamiž Biełaruśsiu i ES, i ciaham troch hadoŭ my znachodzimsia ŭ tupiku, — zaŭvažyŭ pasoł. — ES — samy vialiki suśvietny rynak, pry hetym jon znachodzicca pad bokam u Biełarusi, i kali pravodzić madernizacyju, čamu b nie zasiarodzicca na im? My pastajanna pradastaŭlajem biełaruskim uładam šaniec na supracoŭnictva, ale jany nie adkazvajuć».
Šarepka nahadaŭ, što Biełaruś — treci pa vieličyni handlovy partnior Polščy z krain Uschodniaj Jeŭropy, a Polšča dla Biełarusi, pavodle polskaj statystyki, źjaŭlajecca šostym samym bujnym ekanamičnym partnioram.
«U minułym hodzie tavarazvarot pamiž našymi dziaržavami skłaŭ 3 miljardy dalaraŭ: 2 miljardy impartu z Polščy i miljard dalaraŭ ekspartavanych biełaruskich tavaraŭ.
My prahnazujem pryblizna takuju ž ličbu ŭ hetym hodzie. Za 8 miesiacaŭ 2013 h. tavarazvarot užo skłaŭ 2 miljardy. Adnak kali b usie supiarečnaści pamiž Polščaj i Biełaruśsiu byli likvidavanyja, patencyjalny rostu tavarazvarotu moh by pierasiahnuć u dva-try razy», — skazaŭ pasoł.
Zusim nie asablivaja Biełaruś
Šarepka nie abminuŭ uvahaju i pytańnie samita Uschodniaha partniorstva, na jaki zaprasili i pradstaŭnikoŭ ad Biełarusi, a taksama pazicyju Brusela. Pasoł čarhovy raz padkreśliŭ, što ES daje kožnamu roznyja mahčymaści, i hałoŭnaje adroźnieńnie ŭ ich vykarystańni.
Što tyčycca vilenskaha samita i miesca Biełarusi na im, jano naŭrad ci budzie centralnym. Jość šmat nieadkładnych pytyńniaŭ z Ukrainaj i Małdovaj.
Tak, z Ukrainaj ES moža razmaŭlać na ŭzroŭni kankretnych zakonaŭ. A ŭ Biełarusi niama navat pahadnieńnia ab supracoŭnictvie ź ES. Rasija padpisała takoje pahadnieńnie, a ŭ Biełarusi bazis dla dyjałohu adsutničaje dahetul. Jak u takich umovach možna razmaŭlać pra supracoŭnictva?» — skazaŭ Šarepka.
Pasoł Polščy nahadaŭ, što ŭžo try hady biełaruski bok marudzić z pahadnieńniem ab małym pamiežnym ruchu z Polščaj.
«Polšča padtrymlivaje ideju biaźvizavaha režymu ź Biełaruśsiu — bo da ŭvachoda Polščy ŭ Šenhienskuju zonu pamiž našyi krainami nie było viz.
Ale my nie možam vychodzić za miežy vizavaj palityki ES i pradprymać niešta ŭ adnabakovym paradku. U nas jość šerah prapanoŭ dla Biełaruskaha ŭrada, ale jany pakul zastajucca biez adkazu», — skazaŭ jon.
Šarepka taksama zaŭpeŭniŭ, što Polšča raspracoŭvaje novuju sistemu apracoŭki zajavaŭ na atrymańnie vizaŭ, jakaja vyrašyć isnyja prablemy.
«Kali b narod patrabavaŭ, pasły razmaŭlali b pa-biełarusku»
Pres-kanfierencyju Lešak Šarepka pravodziŭ pa-rasijsku, tamu žurnalist «NN» spytaŭsia, ci nieabchodna dla pasła vałodać biełaruskaju movaj?
«Ja miarkuju, što pasoł musić vałodać dziaržaŭnaju movaj krainy, u jakoj pracuje. Tak stałasia, što ŭ Biełarusi dźvie dziaržaŭnyja movy, bolšaść nasielnictva karystajecca rasijskaj movaj, ja viedaju rasijskuju, i heta troški razhultoŭvaje mianie. Da taho ž polskaja i biełaruskaja mova vielmi padobnyja, i ja biez prablem čytaju pa-biełarusku. Adnak kali b narod razmaŭlaŭ pa-biełarusku i patrabavaŭ toje samaje ad pasłoŭ, jany b taksama razmaŭlali pa-biełarusku», — patłumačyŭ jon.
Ale Šarepka raskazaŭ, što jaho dačka naviedvaje biełaruskamoŭny dziciačy sadok, ale troški «błytajecca ŭ movach», bo papiarednie vučyła ŭkrainskuju, a doma ź joju razmaŭlajuć pa-polsku.
