Pa skančeńni navučalnaj ustanovy dziaŭčyna atrymała raźmierkavańnie ŭ Čavuski rajon, ale na miesca pracy nie źjaviłasia.
Baćki Janiny Ałanini
Administracyja ŭniviersiteta źviarnułasia z pazovam u Leninski sud Mahilova, jaki pryznaŭ pretenzii da Ałanini pravamocnymi. 20 listapada abłasny sud razhledzieŭ kasacyjnuju skarhu vypusknicy ŭniviersiteta i pakinuŭ rašeńnie rajonnaha suda ŭ sile.
Jana Ałanini ciapier u Siryi. Kali vučyłasia, vyjšła zamuž za hramadzianina hetaj krainy.
Intaresy dziaŭčyny pradstaŭlaje jaje maci Iryna Krupickaja. Pavodle jaje, kali dačka zakančvała ŭniviersitet, to mieła dvaich niepaŭnaletnich dziaciej. Hetuju akaličnaść nie ŭličyli, raźmiarkoŭvajučy jaje na pracu, zaznačaje žančyna. Pavodle zakanadaŭstva, kali jość niepaŭnaletnija dzieci, studentu musiać dać svabodnaje raźmierkavańnie albo znajści pracu pa miescy žycharstva. Sudu spadarynia Krupickaja davodziła, što va ŭniviersitecie nie dačku dapuskali da zdačy ekzamienaŭ, pakul nie budzie dakumienta ab znojdzienym miescy pracy: kazali, što heta zvyčajnaja farmalnaść.
«Sud nie ŭličyŭ usich abstavinaŭ spravy.
Što raźmierkavańnie adbyłosia — absalutna niapravilna. Jano było vymušanym. Jana nie mieła mahčymaści pajechać tudy na pracu sa svaimi dvuma dziećmi. Albo joj treba było kinuć dziaciej i zastacca adnoj, albo zastacca ź dziećmi i adpracoŭvać tut. Dziaržava nie pryjšła na dapamohu svajmu hramadzianinu», — kamientuje sudovyja pastanovy Iryna Krupickaja.
Jana Ałanini miełasia pracavać u Domie kultury vioski Harbavičy chormajstram.
U skarzie ŭ abłasny sud adznačajecca, što hetaja vioska znachodzicca ŭ zonie stałaha radyjacyjnaha kantrolu.
Iryna Krupickaja adznačaje, što hety faktar staŭ vyznačalnym u pytańni pracaŭładkavańnia dački:
«My nie možam svaich dziaciej padstaŭlać pad ryzyku zachvorvańnia. Akramia taho, joj nie prapanavali tam nijakaha žytła. U jaje ž dzieci daškolnaha ŭzrostu. Joj treba było jeździć tudy. Akład u jaje — 900 tysiač. Jon nie davaŭ mahčymaści na hetyja hrošy žyć. Navat u kodeksie adznačajecca, što raźmierkavańnie — heta dobra dla čałavieka, heta pieršaje miesca jaho pracy. To ŭ našym vypadku było parušeńnie jaje pravoŭ jak maci, jak čałavieka, jak žonki ŭrešcie».
Na arhumienty abarony sudovaja kalehija piarečyła tym, što varta było źviartacca va ŭniviersitet z zajavaj na pieraraźmierkavańnie i abaviazkova vyjści na pracu, a vypusknica ŭniviersiteta hetaha nie zrabiła. U adkaz Iryna Krupickaja kazała, što skardziłasia na raźmierkavańnie ŭ Ministerstva adukacyi, kultury, Saviet ministraŭ, adnak adkazy prychodzili jak pad kapirku. «Nichto nie chacieŭ bačyć, što za prablemaj staić los čałavieka», — ledź nie płačučy, kazała žančyna.
«U pryvatnych ža hutarkach, — pryznavałasia na sudzie Krupickaja, — čynoŭniki dakarali, što nie varta było dačce vychodzić zamuž za siryjca».
Ci ŭličvała administracyja VNU pry raźmierkavańni ŭ čarnobylskuju zonu toje, što Jana Ałanini maje dvuch małaletnich dziaciej?
Pradstaŭnik jurydyčnaha siektaru ŭniviersiteta Mikałaj Čmil u razmovie z karespandentam «Svabody» paviedamiŭ, što ŭsio, maŭlaŭ, uličvałasia:
«Adkul vy ŭziali čarnobylskuju zonu? Vaźmicie zakon, jaki adnosić peŭnyja terytoryi da zabrudžanych, a tak kazać ahulna, što Mahiloŭskaja vobłaść — zabrudžanaja, dyk chto tak robić? Treba ž viedać: kankretnaje miesca, dzie jana pracuje, — jano adniesienaje zakonam da hetych zabrudžanych ci nie. Jaje maci była na pryjomie ŭ rektara, usio joj było patłumačana. Z maralnaha punktu hledžańnia my razumiejem jaje situacyju. Ale jość zakon, jaki my nie majem prava abychodzić. Jakoje budzie rašeńnie suda, takomu my i padparadkujemsia».
Płacić 120 miljonaŭ baćkam za dačku niama z čaho, bo jany piensijaniery.
Kažuć, što praciahnuć damahacca spraviadlivaści. Dzie ciapier dačka, jany nie viedajuć, bo ŭ Siryi vajna. Zaznačajuć, što dačku muž nie adpuskaje ź dziećmi, a jana rviecca na radzimu:
«Viadoma ž, choča. Viaducca hutarki z mužam. Ciapier my nie viedajem, dzie jana, jak jana. Jany ŭvieś čas pierajazdžajuć. Ale tut, jak kažuć u narodzie, nitka idzie za ihołkaj. Heta jaje muž. Jaje muž stavić takija ŭmovy. Kaža: «Pakidaj dziaciej tut, u Siryi». Jana ž najpierš dumaje pra dziaciej. Jana nie dumaje pra Harbavičy, a tolki pra dziaciej», — tłumačać situacyju z dačkoj jaje maci i baćka Arkadź Krupicki.
Jana Ałanini skončyła ŭniviersitet u 2012 hodzie. Za čas navučańnia była ŭ dekretnych adpačynkach, a taksama pa zdaroŭi. Navučańnie raściahnułasia na dziesiać hadoŭ.
Kalehija abłasnoha suda zrabiła dla dziaŭčyny palohku, skasavaŭšy 6 miljonaŭ rubloŭ sudovych vydatkaŭ.
