U sacyjalnych sietkach źjaviłasia infarmacyja, što dyrektar futbolnaha kłuba «Maładziečna», jaki vystupaje ŭ 2-j lizie čempijanatu, Alaksandr Lubaniec admoviŭ u prośbie zaŭziataraŭ, kab emblema kamandy była na biełaruskaj movie.
My patelefanavali Alaksandru, kab ź pieršych vusnaŭ pačuć matyvacyju. U vyniku pačuli šmat usiaho cikava. Prapanuje dasłoŭny adkaz Alaksandra Lubanca.
«Ja ničoha suprać biełaruskaj movy nie maju. Heta doŭhaja takaja razmova nasamreč. Chvilinaŭ na piatnaccać-dvaccać. Ja prosta pra toje, što my z Rasijaj majem adno minułaje. Biełaruś raniej uvachodziła i ŭ skład Vialikaha Kniastva Litoŭskaha i Rečy Paspalitaj, Rasijskaj impieryi. Toje, što adbyłosia ŭ 1991-m – zdrada Harbačovym, i staŭšy nastupstvam, razvał Savieckaha sajuza Jelcynym – heta vielmi kiepska. Na fonie takoha adździaleńnia mnohich respublik ad Savieckaha Sajuza, mocnaha Savieckaha sajuza, u tym liku prybałtyjskich krain, Ukrainy i našaj Biełarusi.
Kaniečnie, u Biełarusi jość svaja histaryčnaja spadčyna, svaja historyja. Jak naš narod raźvivaŭsia ŭ ramkach VKŁ, Rečy Paspalitaj, Rasijskaj impieryi. Ale ciapier takaja situacyja, što tut asabliva niama čym hanarycca, što my nie ŭ składzie Savieckaha sajuza, a praz zdradu Harbačova my niezaležnyja ad Rasii. Ja nie liču, što tut jość povad dla honaru.
Jość nacyjanalistyčnyja ruchi, tak zvanych nacyjanalistaŭ va Ukrainie, Prybałtycy. Nacyjanalistyčnyja idei nie vielmi dobryja dla zbližeńnia narodaŭ u adnu mocnuju adzinuju dziaržavu z Rasijaj. Biez Rasii nasamreč ni Prybałtyka (chacia jany ŭstupili ŭ Jeŭrasajuz, jak nahoj u štości)… Ukraina ciapier taksama moža paŭtaryć sumny dośvied Prybałtyki.
A Biełarusi nie treba rabić hetych pamyłak, addalacca ad Rasii. My adzin narod. Adno supolnaje ŭ nas. Dziakuj Bohu, što prezident zrabiŭ dźvie dziaržaŭnyja movy – i biełaruskuju, i ruskuju.
I ŭ nas niama bardaka, jak va Ukrainie. Ukrainskaja – i ŭsio. Niezdarma ž i nie aniekdotaŭ stolki, jak nie lubiać maskalej u Zachodniaj Ukrainie. Niezdarma ž jany źjavilisia.
Što treba našym hieapalityčnym voraham? Kab Ukraina, Biełarusija byli maksimalna niezaležnyja ad Rasii, nie ad Jeŭropy, inšych krain, a ad Rasii. Ja nie baču asablivaha honaru, što my suvierennaja ad Rasii dziaržava. Ad Jeŭropy -- tak. Tut, zhodzien. My biełarusy nie ŭstupili ni ŭ što takoje… u płanie intehracyi ź Jeŭropaj. Toje, što my nie ŭ adnoj dziaržavie z Rasijaj, tut hanarycca niama čym.
Ja nie prapahanduju, što nam treba tolki na ruskaj vieści, kab ŚMI byli tolki na ruskaj. Kali ja mahu niejak paŭpłyvać, to chacia b emblema była na ruskaj movie. Heta ž emblema budzie na kamiercyjnych prapanovach, aficyjnych listach, jakija buduć adrasoŭvacca ŭ inšyja arhanizacyi. Kali tak atrymałasia, što mnie davieryli pasadu dyrektara našaha futbolnaha kłuba, kali ja mahu na heta paŭpłyvać, to niachaj choć emblema budzie na ruskaj movie. Ničoha nie maju suprać, kab kryčałki byli pa-biełarusku.
«NN»: Vašy fanaty, nakolki pomniu, vykarystoŭvajuć karystajucca biełaruskaj movaj na banierach, płakatach?
AŁ: Niachaj vykarystoŭvajuć. Mahčyma, u ich svaje matyvy vykarystoŭvać biełaruskuju movu. Ja ničoha suprać nie maju.
* * *
Futbolny kłub «Maładziečna» vystupaje ŭ druhoj lizie čempijanata Biełarusi. U hetym siezonie zaniaŭ dziasiataje miesca z trynaccaci kamand.
