Veb-kamiera ź miesca padziej u Kijevie.
24 listapada ŭkrainskaja apazicyja płanavała vyvieści ludziej na vulicy Kijeva ŭ padtrymku jeŭrapiejskaha vybaru Ukrainy.
13:15
Udzielniki akcyi apazicyi sabralisia ŭ parku Šaŭčenki ŭ Kijevie. «Siońnia my pavinny vyrašyć los Ukrainy, bo mienavita narod vyrašaje svoj los i ŭ naroda jość svaje patrabavańni», — kazali ŭkrainskija aktyvisty.
Nahadajem, što ŭ čaćvier premjer Ukrainy Mikałaj Azaraŭ zajaviŭ, što Kijeŭ nie budzie padpisvać pahadnieńnie ab Asacyjacyi intehracyi ź ES, a robić svoj vybar na karyść z Rasijaj.
Viktar Janukovič paskardziŭsia prezidentu Litvy Dali Hrybaŭskajcie na šantaž z boku Maskvy.
Ad viečara čaćviarha va ŭkrainskich haradach pačalisia łakalnyja pratesty. Ale samy vialiki mitynh zapłanavany na siońnia.
13:25
Milicyja sprabavała pastavić svaich supracoŭnikaŭ kala Biesarabskaj płoščy. Adnak kałonie ŭdałosia prabicca i zaraz ludzi pavolna ruchajucca dalej. Jany vykrykvajuć «Juli — volu», «Bandu - heć!», «Ruch u Jeŭropu», «Ukraina ŭ Jeŭropu».
Kałona plaskaje ŭ dałoni i śvišča. Na svaim šlachu mitynhoŭcy raźbili ahitacyjnuju pałatku Kamunistyčnaj partyi. Milicyjantam ludzi kryčali «Chłopcy, uśmichniciesia» i «Jak vam nie soramna?».
13:43
Pomnik Leninu na Biesarabskaj płoščy achoŭvaje vialikaja kolkaść bajcoŭ «Bierkuta». Manumient «pravadyru suśvietnaha praletaryjatu» abkružany patrojnym kolcam pravaachoŭnikaŭ.
Udzielniki jeŭraintehracyjnaha mitynhu, jakija prachodziać mima pomnika, hukajuć: «Kamuniaku na hilaku!»
Taksama tut ža aktyvisty padpalili čyrvony ściah. Jašče niekalki kamunistyčnych ściahoŭ raskidali prama na asfalcie. Mitynhoŭcy vycirajuć ab ich nohi.
Učora va Ukrainie adznačalisia sumnyja ŭhodki Haładamoru (1932—1933), jakija zabraŭ niekalki miljonaŭ čałaviečych žyćciaŭ u SSSR, u tym liku i va Ukrainie.
Zaraz šeście prychilnikaŭ jeŭraintehracyi raściahnułasia pa Chryščaciku i bulvary Šaŭčenki i kročyć u napramku Jeŭrapiejskaj płoščy.
14:41
Samalotu Vitala Kličko nie dali pasadku ŭ Kijevie. Samalot pryziamliŭsia ŭ inšym horadzie, ciapier palityk dabirajecca na «Jeŭramajdana» mašynaj.
U chodzie ŭ padtrymku jeŭraintehracyi pryniaŭ udzieł Uładzimir Kličko, jaki prajšoŭ razam ź mitynhoŭcam ŭvieś šlach.
15:10
Narodny deputat ad frakcyi «Baćkaŭščyna» Alaksandr Turčynaŭ zajaviŭ, što ŭkraincy vyjšli na Jeŭrapiejskuju płošču, kab abaranić svaje pravy.
Lidar frakcyi «Baćkaŭščyna» Jacaniuk skazaŭ: «My pavinny dakładna skazać. Saviecki Sajuz, jaki nazyvajecca Mytny sajuz Uładzimira Pucina nam nie patrebien, nam patrebien Jeŭrapiejski sajuz».
Pierad prysutnymi vystupiili Maryja Burmaka i «Płač Jeramii». Taksama prysutnyja praśpiavali «Čyrvonu rutu».
Ukrainskija ŚMI nazyvajuć ličbu ŭdzielnikaŭ u 50—100 tys., milicyja — 22 tys.
16:10
Narod pacichu razychodzicca z akcyi pratestu. Viadučyja abviaścili maleńkuju muzyčnuju paŭzu, paśla jakoj abiacajuć jašče vystupleńni hramadskich aktyvistaŭ i palitykaŭ. Pierad hetym uvieś piacidziesiacitysiačny natoŭp vykanaŭ himn Ukrainy.
Padčas vystupu adzin ź lidaraŭ apazicyi, Alaksandr Turčynaŭ paviedamiŭ, što paśla mitynhu na Jeŭrapiejskaj płoščy budzie arhanizavany štab akcyi pratestu.
«Paśla akcyi my ŭsio adpraŭlajemsia ŭ Administracyju prezidenta, Kabmin i Viarchoŭnuju Radu, kab vykazać svaju dumku», — skazaŭ jon.
17:10
Častka ŭdzielnikaŭ mitynhu nakiravałasia da budynka Kabinieta ministraŭ, adbyłosia niekalki sutyčak ź milicyjaj.
Usia płošča pierad Kabminam i vulica Hrušeŭskaha ŭ abodva baki zapoŭnienaja ludźmi. Milicyjanty ŭžyli dubinki i ślozacieny haz.
Manifiestanty taksama ŭžyli ślozaciečny haz i pačali kidać vybuchovyja pakiety.
Kabiniet ministraŭ padrychtavaŭsia da abłohi, ujezdy ŭ dvor zabłakavali hruzavikami. Varoty začynienyja na łancuh. Bakavyja dźviery zabłakavanyja draŭlanaj meblaj.
Častka mitynhoŭcaŭ pajšła rabić abłohu Viarchoŭnaj Rady.
17:37
Stychijny mitynh pad Kabinietam ministraŭ zaviaršajecca. Udzielniki patrochu razychodziacca - častkova ŭ napramku Jeŭrapiejskaj płoščy, častkova ŭ Viarchoŭnuju Radu Ukrainy.
Aktyŭnych dziejańniaŭ ni z boku ŭdzielnikaŭ akcyi, ni z boku milicyi nie adbyvajecca.
18:20
Na Jeŭrapiejskaj płoščy pačynajuć stavić namioty.
18:30
Mitynhoŭcy raspačali sprobu šturmu kabinieta ministraŭ u Kijevie.
Pratestoŭcy vyłamali mietaličny šłahbaŭm i sprabavali vykarystoŭvać jaho jak taran, kab prarvać ačapleńnie milicyi. Pravaachoŭniki ŭ adkaz znoŭ ŭžyli dubinki i ślezaciečny haz.
Padčas sutyknieńniaŭ traŭmu atrymaŭ supracoŭnik milicyi, u jakoha kinuli mietaličnaj truboj, raźbiŭšy jamu tvar.
