Pierakanaŭčaha pośpiechu na daterminovych parlamenckich vybarach va Ŭkrainie dasiahnuŭ blok Julii Cimašenki. Razam «pamarančavyja partyi» zojmuć 228 miescaŭ u 450-miascovaj Viarchoŭnaj Radzie. Filozaf Mikoła Rabčuk dla nn.by: Ale dla praryvu patrebnyja niepapularnyja kroki.
Pierakanaŭčaha pośpiechu na daterminovych parlamenckich vybarach va Ŭkrainie dasiahnuŭ blok Julii Cimašenki.
Vyniki daterminovych parlamenckich vybaraŭ va Ŭkrainie ŭ značnaj stupieni akazalisia sensacyjnymi. Partyi, jakija ŭznačalvajuć Julija Cimašenka i Viktar Juščanka, dasiahnuli našmat lepšaha vyniku, čym na papiarednich vybarach, i navat čym pradkazvali sacyjolahi na pieršych etapach kampanii.
Adstavańnie Bloku Cimašenki ad Partyi rehijonaŭ skaraciłasia ŭ paraŭnańni ź minułymi vybarami z 11 da 3,5 %.
Razam partyi Cimašenki i Juščanki atrymajuć 228 mandataŭ u novaj Radzie. U papiaredniaj jany mieli paśla vybaraŭ 208, pryčym za čas isnavańnia Rady Janukovič pierakupiŭ 30 dziasiatki deputataŭ ź ichnych šerahaŭ.
Partyja rehijonaŭ i kampartyja, što abapirajucca na rasiejskamoŭnaje nasielnictva ŭschodu Ŭkrainy, buduć mieć u novaj Radzie 202 mandaty.
Jašče 20 miescaŭ zojmuć pradstaŭniki drobnaj centrysckaj hrupoŭki biez vyraznaj idealahičnaj pazycyi.
Vyniki vybaraŭ z roźnicaj da 0,1—0,4 % supali z dadzienymi čatyroch praviedzienych ekzyt-połaŭ. Naziralniki taksama aceńvajuć mahčymaść falšavańnia vybaraŭ va Ŭkrainie ŭ 1 %. Vybarčy praces tam prazrysty, u skład kamisij uvachodziać pradstaŭniki ŭsich palityčnych siłaŭ, daterminovaje hałasavańnie abmiežavanaje 0,5 % ad vybarcaŭ, a naziralniki majuć mahčymaść sačyć za ŭsimi etapami padliku hałasoŭ. U hetym adroźnieńnie ŭkrainskaj vybarčaj pracedury ad biełaruskaj.
Paśla padliku 99,9 % biuleteniaŭ, Partyja rehijonaŭ Viktara Janukoviča maje 34,3 %. U śpinu joj dychajuć cimašenkaŭcy z 30,7%. Zatym – “Naša Ŭkraina” (14,2 %). U Kamunistyčnaj partyi 5,4 %. Blok Litvina atrymaŭ 4 %.
Dla paraŭnańnia pryvodzim vyniki parlamenckich vybaraŭ va Ŭkrainie paŭtarahadovaj daŭniny (krasavik 2006 h.): BIUT – 22,29 %, Partyja rehijonaŭ – 32,14 %, “Naša Ŭkraina” – 13,95 %, KPU – 3,66 %, SPU – 5,69 %, Blok Litvina – 2,44 %.
Pavodle staršyni ŭkrainskaha CVK Uładzimiera Šapavała ahułam u daterminovych parlamenckich vybarach uziali ŭdzieł 62,51 % vybarščykaŭ.
Na biełaruskich vybarčych učastkach najbolšuju kolkaść hałasoŭ nabrała Partyja rehijonaŭ.
Julija Cimašenka spadziajecca sfarmavać urad. Na toje samaje raźličvaje i Viktar Janukovič. Prezydent Juščanka ŭ sieradu źviarnuŭ zaklik da farmavańnia ŭradavaj kaalicyi da ŭsich troch asnoŭnych palityčnych siłaŭ, što moža być znakam taho, što jon chacieŭ by ŭtvareńnia šyrokaj kaalicyi, jakaja b zadavalniała i ŭschod, i centar krainy.
Ju. Cimašenka ŭ adkaz zajaviła, što nia ŭvojdzie ŭ adnu kaalicyju z Partyjaj rehijonaŭ.
* * *
Mikoła Rabčuk: Dla ŭkrainskaha praryvu patrebnyja niepapularnyja kroki
Vyniki daterminovych parlamenckich vybaraŭ kamentuje ŭkrainski filozaf Mikoła Rabčuk:
“Vybary adbylisia – heta samaje hałoŭnaje. Zdajecca, što nichto nia budzie abskardžvać ich vyniki, bo parušeńni, kali i byli, to nia vielmi istotnyja. Vynik vybaraŭ taksama dosyć pradkazalny. Adzinaj niečakanaściu źjaŭlajecca dosyć vialiki pracent, jaki nabraŭ BIUT. Razam z tym, absalutnaj bolšaści ŭ parlamencie nie atrymaŭ nichto. Heta aznačaje, što ŭ Radzie iznoŭ pačniecca vieścisia handal za toje, kamu vyhadna, a kamu nia vielmi ŭvachodzić u kaalicyi. Heta nie na karyści nikomu. Najchutčej, usio ž budzie sfarmiravanaja aranžavaja kaalicyja. Ale hetyja palityki nastolki papulisty i vartyja na ŭsialakija abiacanki, što ŭrešcie Ŭkraina ad hetaha nia vyjhraje. Dziela sapraŭdnaha ŭkrainskaha praryvu patrebnyja nie papulisckija, a naadvarot, nie papularnyja siarod nasielnictva kroki. Bajusia, što hety parlament budzie niazdolny na takoje. Siońnia ŭžo dakładna zrazumieła, što druhoha Majdanu nia budzie. Navat kali ludzi i vyjduć na płošču, to chutčej za ŭsio heta budzie aperetkavy Majdan, jaki nie prastaić bolš za niekalki tydniaŭ. Ludzi vielmi stamilisia ad palityki”.
